शेती महामंडळाची साडेचार हजार एकर जमीन देण्यास महसूल विभागाची मान्यता
मुंबई : अहिल्यानगर जिल्ह्यातील हरेगाव मळा येथील ४ हजार २०० एकर जागा दारुगोळा (Ammunition), स्फोटके, संरक्षण साहित्य (Defense materials), सौरऊर्जा प्रकल्प या तीन उद्योगांसाठी मंजूर करण्यात आली आहे. शेती महामंडळाची ही जमीन या उद्योगांना देण्यास महसूल विभागाने मंगळवारी मान्यता दिली.
दारुगोळा व स्फोटके संशोधन आणि विकास सुविधा निर्माण करण्यासाठी डीआरडीओला (Defence Research and Development Organisation) १ हजार ५०० एकर, सौरपार्क व पवनऊर्जा प्रकल्पासाठी महाऊर्जाला १२०० एकर तसेच संरक्षण साहित्य निर्मिती प्रकल्पासाठी निबे ऑर्डन्स अँण्ड मेरी टाईम फँक्टीरीज लिमिटेडला १ हजार ५०० एकर अशी ४ हजार २०० एकर जागा देण्याचा निर्णय घेतला आहे. महसूलमंत्री चंद्रशेखर बावनकुळे (Revenue Minister Chandrashekhar Bawankule) यांच्या अध्यक्षतेखाली मंत्रालयात मंगळवारी मंत्रिमंडळ उपसमितीची बैठक झाली. बैठकीला शिक्षणमंत्री दादा भुसे आणि पर्यावरण व वातावरणीय बदल मंत्री पंकजा मुंडे यांची प्रमुख उपस्थित होत्या.
या संस्थांना ही जमीन ४९ वर्षांच्या भाडेकरारावर (On lease) देण्यात येणार आहे. यासाठी प्रति एकर ५० हजार रुपये वार्षिक भाडे निश्चित करण्यात आले असून, तीन वर्षांचे भाडे एकाच वेळी भरावे लागणार आहे. या संस्थांना जमीन दिल्यानंतर शेती महामंडळाकडे शिल्लक राहणारी २ हजार ३०० एकर आणि अन्य १ हजार ६०० एकर अशी एकूण ३ हजार ९०० एकर अकारी पड जमीन परिसरातील शेतकऱ्यांना वाटप करण्याचा निर्णयही घेतला आहे. या निर्णयाच्या प्रत्यक्ष अंमलबजावणीसाठी राज्य मंत्रिमंडळाच्या अंतिम मंजुरी घ्यावी लागेल. त्यानंतर वाटपाची प्रक्रिया सुरू केली जाईल, असे उपसमितीने स्पष्ट केले.