मुंबई पोलिसांच्या तात्काळ कारवाईने आरोपीला २४ तासाच्या आत अटक
Mumbai Local Train Murder Case : मुंबई: मुंबईच्या (Mumbai) लोकल ट्रेनमध्ये (Local Train) किरकोळ वादातून झालेल्या तरुणाच्या हत्येप्रकरणी पोलिसांनी मोठी कारवाई करत मुख्य आरोपी रोशन सुवर्णा याला अटक केली आहे. आरोपीला कुर्ला परिसरातून ताब्यात घेण्यात आल्याची माहिती समोर आली आहे. (Mumbai Local Train Murder)
नेमकं काय घडलं होतं त्या रात्री?
मंगळवारी रात्री जोगेश्वरी ते मालाड स्थानकादरम्यान धावणाऱ्या लोकल ट्रेनमध्ये ही धक्कादायक घटना घडली होती. पावसाचे पाणी डब्यात येत असल्याने ट्रेनचा दरवाजा बंद करण्यावरून दोन प्रवाशांमध्ये वाद झाला. हा वाद इतका टोकाला गेला की, आरोपी रोशन सुवर्णा याने २२ वर्षीय मयंक लोहार याच्यावर चाकूने हल्ला केला.
मिळालेल्या माहितीनुसार, आरोपीने आपल्या बॅगेतून मोठा चाकू काढून मयंकच्या छातीत आणि कंबरेवर अनेक वार केले. गंभीर जखमी झालेल्या मयंकचा (Mayank Lohar) मोठ्या प्रमाणात रक्तस्राव झाल्याने मृत्यू झाला.
घटनेनंतर आरोपी बोरिवली स्थानकावर उतरून फरार झाला होता. मात्र, सीसीटीव्ही फुटेज आणि तांत्रिक तपासाच्या आधारे लोहमार्ग पोलिसांनी त्याचा माग काढला. आरोपीच्या शोधासाठी सात विशेष पथके तयार करण्यात आली होती. अखेर पोलिसांनी त्याला अटक करण्यात यश मिळवले. आरोपीला पोलिसांनी कुर्ला येथून ताब्यात घेतले.
मृत मयंक लोहार हा विरार येथील रहिवासी होता. त्याने फायनान्स मार्केटिंगचे शिक्षण घेतले होते आणि गेल्या नऊ महिन्यांपासून अंधेरी परिसरातील एका खासगी संस्थेत नोकरी करत होता. नोकरीसाठी तो दररोज विरार ते अंधेरी असा प्रवास करत होता.
मयंकच्या निधनाने त्याच्या कुटुंबावर दुःखाचा डोंगर कोसळला आहे. त्याच्या पश्चात आई-वडील, एक बहीण आणि दोन भाऊ असा परिवार आहे. दरम्यान, आरोपीची सखोल चौकशी सुरू असून या हत्येमागील नेमके कारण आणि इतर बाबींचा तपास पोलीस करत आहेत.