मुंबई : शिवसेनेचे खासदार संजय पाटील(Sanjay Patil) यांनी पत्रकारांसोबत झालेल्या वादानंतर जाहीरपणे दिलगिरी व्यक्त केली आहे. वादाच्या वेळी अनवधानाने वापरलेल्या अपशब्दांबद्दल त्यांनी संपूर्ण माध्यम प्रतिनिधींची माफी मागितली. तसेच, माझ्या राजकीय भूमिकेवर जरूर टीका करा; मात्र माझ्या कुटुंबाला, विशेषतः दिवंगत वडिलांना राजकारणात ओढू नका, अशी भावनिक विनंतीही त्यांनी केली.
याबाबत बोलताना खासदार संजय पाटील म्हणाले, मी शिवसेनेत प्रवेश केल्यापासून सातत्याने अपमान सहन करत आहे. आज सकाळी पत्रकार मित्र पुन्हा आले तेव्हा मी त्यांना हात जोडून विनंती केली होती की, या विषयावर मला अधिक काही बोलायचे नाही. मात्र तोच प्रश्न वारंवार विचारला गेल्याने वाद वाढला. त्या गोंधळात माझ्याकडून अपशब्द निघाले. त्याबद्दल मी सर्व पत्रकार(Repotar) बंधू-भगिनींची मनापासून माफी मागतो.
ते पुढे म्हणाले, माझ्यावर राजकीय टीका करण्यास माझी हरकत नाही. पण माझी पत्नी, मुलगी, आई आणि आज हयात नसलेले वडील यांच्याबाबत खोट्या गोष्टी पसरवणे किंवा अपशब्द वापरणे अयोग्य आहे. माझ्या राजकीय भूमिकेवर तुम्हाला जे बोलायचे आहे ते जरूर बोला, पण कृपया माझ्या कुटुंबाला यापासून दूर ठेवा.