मुंबई : मुंबईवरील २६/११ दहशतवादी हल्ला हा देशाच्या इतिहासातील सर्वात वेदनादायी घटनांपैकी एक मानला जातो. या हल्ल्यातील एकमेव जिवंत पकडलेला दहशतवादी अजमल कसाब आणि त्याच्याविरोधात न्यायालयात यशस्वीपणे लढणारे विशेष सरकारी वकील उज्ज्वल निकम यांची कहाणी आता 'प्रहार – द उज्ज्वल निकम स्टोरी' (Prahar The Ujjwal Nikam Story) या चित्रपटाच्या माध्यमातून प्रेक्षकांसमोर येणार आहे. (Prahar The Ujjwal Nikam Story)
निर्माता दिनेश विजन यांच्या 'मॅडडॉक फिल्म्स'ने नुकतेच या चित्रपटाचे पहिले पोस्टर, कलाकारांचे लूक आणि टीझर प्रदर्शित केले. टीझर रिलीज होताच सोशल मीडियावर मोठी चर्चा रंगली असून, एका कास्टिंगने मराठी प्रेक्षकांना विशेष धक्का दिला आहे.
ललित प्रभाकरची भूमिका महत्त्वाची
मराठी चित्रपटसृष्टीतील लोकप्रिय अभिनेता ललित प्रभाकर या चित्रपटात अजमल कसाबची भूमिका साकारत आहे. आजवर रोमँटिक आणि सकारात्मक भूमिकांमधून ओळख निर्माण करणाऱ्या ललितचा हा पूर्णपणे वेगळा आणि आव्हानात्मक अवतार पाहून चाहते आश्चर्यचकित झाले आहेत. त्याच्या या भूमिकेची सध्या सर्वत्र चर्चा सुरू आहे.
तर विशेष सरकारी वकील उज्ज्वल निकम यांच्या भूमिकेत अभिनेता राजकुमार राव झळकणार आहे. या भूमिकेसाठी राजकुमारने कोणताही कृत्रिम मेकअप किंवा प्रोस्थेटिक्स न वापरता निकम यांची देहबोली, बोलण्याची शैली आणि न्यायालयातील व्यक्तिमत्त्व आत्मसात करण्यावर भर दिला आहे.
दिग्दर्शक अविनाश अरुण यांच्या दिग्दर्शनाखाली तयार होत असलेल्या या चित्रपटात वामिका गब्बी, जयदीप अहलावत आणि सिकंदर खेर यांच्याही महत्त्वाच्या भूमिका आहेत.
'प्रहार – द उज्ज्वल निकम स्टोरी' हा चित्रपट ७ ऑगस्ट २०२६ रोजी देशभरातील सिनेमागृहांमध्ये प्रदर्शित होणार आहे. टीझरनंतर चित्रपटाबद्दलची उत्सुकता मोठ्या प्रमाणात वाढली असून, २६/११ हल्ल्यानंतरच्या न्यायालयीन लढ्याची कथा मोठ्या पडद्यावर कशी साकारली जाते याकडे सर्वांचे लक्ष लागले आहे.