Mumbai: मुंबईच्या भायखळा (Byculla) परिसरातून एक धक्कादायक बातमी समोर आली आहे. मोहरमच्या मिरवणुकीदरम्यान उंदीर मारण्यासाठी विषारी गोळ्या वाटल्याप्रकरणी भायखळा पोलिसांनी एका व्यक्तीला अटक केली आहे. अधिकाऱ्यांनी संशयिताकडून एकूण १४,९०० (14,900) विषारी गोळ्या जप्त केल्या आहेत. या घटनेमागे एक मोठे षडयंत्र असल्याचा संशय व्यक्त केला जात आहे.
मोहरमच्या दिवशी चार जणांना कॅप्सूल वाटत असताना भायखळा पोलिसांनी एका व्यक्तीला अटक केली. पोलीस उपआयुक्त जयंत मीना यांनी पत्रकार परिषदेत सांगितले की, मिरवणुकीदरम्यान आरोपी परवानगीशिवाय कॅप्सूल वाटत असल्याचे पाहून पोलिसांना संशय आला. तपासादरम्यान पोलिसांनी त्याच्याकडून १४,९०० विषारी कॅप्सूल जप्त केल्या. या कॅप्सूलमध्ये झिंक फॉस्फाईड (Zinc phosphide)असल्याचा दावा पोलिसांनी केला आहे.
कॅप्सुलमुळे एका व्यक्तीची प्रकृती बिघडली
या कॅप्सूलचे सेवन केलेल्या एका व्यक्तीची प्रकृती खालावली असून त्याला उपचारासाठी रुग्णालयात दाखल करण्यात आले आहे. या कारवाई दरम्यान पोलिसांनी संशयिताकडून १४,९०० कॅप्सूल जप्त केल्या. तपासात असेही उघड झाले की, त्याने ३०,००० रिकाम्या कॅप्सूल आणि ५० किलो फॉस्फरसची मागणी केली होती.आरोपी हा बीबीए पदवीधर असून त्याचा पेंन्ट व्यवसाय आहे. आरोपीने या आधी इराक देशाचा दौरा केल्याचा पोलीस तपासातून समोर आले आहे. दरम्यान,आरोपीचा कोणत्याही दहशतवादी संघटनेशी संबंध आहे का, तसेच मोठा घातपात घडवून आणण्याचा त्याचा उद्देश होता का, याचा सर्व बाजूंनी तपास भायखळा पोलीस करत आहेत. तपास पूर्ण होईपर्यंत या प्रकरणामागील नेमका हेतू स्पष्ट झालेला नसल्याचे पोलिसांनी सांगितले आहे.