कॅन्सस सिटी (मिसूरी) : जॉन आरियासच्या पहिल्या हाफमधील निर्णायक गोलच्या जोरावर कोलंबियाने घानाचा १-० असा पराभव करत फिफा विश्वचषक २०२६ च्या राऊंड ऑफ १६ मध्ये प्रवेश केला. ॲरोहेड स्टेडियमवर खेळल्या गेलेल्या या सामन्यात कोलंबियाने सुरुवातीपासूनच आक्रमक खेळ करत विजयावर शिक्कामोर्तब केले.
आता उपांत्यपूर्व फेरीत स्थान मिळवण्यासाठी कोलंबियाचा सामना मंगळवारी कॅनडातील व्हँकुव्हर येथे स्वित्झर्लंडशी होणार आहे.
सामन्याच्या सुरुवातीलाच कोलंबियाला मोठा धक्का बसला. आघाडीचा स्ट्रायकर जॉन कोर्डोबा याला मांडीच्या दुखापतीमुळे मैदान सोडावे लागले. त्याच्या जागी प्रशिक्षक नेस्टर लोरेन्झो यांनी लुईस सुआरेझला मैदानात उतरवले आणि हा निर्णय संघासाठी निर्णायक ठरला.
१४व्या मिनिटाला डॅनियल मुनोजने उजव्या बाजूने केलेल्या चालीनंतर सुआरेझने गोलसमोर अचूक क्रॉस दिला. त्या चेंडूवर झेपावत जॉन आरियासने घानाचा गोलरक्षक लॉरेन्स अती झिगीला चकवत सहज गोल नोंदवला आणि कोलंबियाला १-० अशी आघाडी मिळवून दिली.
यानंतर घानाने बरोबरीसाठी जोरदार प्रयत्न केले. दुसऱ्या हाफमध्ये अनेक आक्रमणे रचली, मात्र कोलंबियाच्या भक्कम बचावफळीने आणि गोलरक्षकाच्या उत्कृष्ट कामगिरीने घानाला यश मिळू दिले नाही. अखेर आरियासचा गोलच सामन्यातील निर्णायक क्षण ठरला.
या सामन्यादरम्यान कॅन्सस सिटीमध्ये तापमान तब्बल ३१ अंश सेल्सिअस होते, तर उष्णतेचा निर्देशांक त्याहून अधिक होता. त्यामुळे खेळाडूंना उष्म्याचा मोठा सामना करावा लागला. फिफाने दिलेले हायड्रेशन ब्रेक दोन्ही संघांसाठी दिलासादायक ठरले. अनेक खेळाडूंना निर्जलीकरण आणि स्नायूंमध्ये गोळे येण्याचा त्रास होत असतानाही त्यांनी जिद्दीने सामना पूर्ण केला.
विजयानंतर कोलंबियाचा आत्मविश्वास उंचावला असून आता त्यांच्यासमोर स्वित्झर्लंडचे आव्हान आहे. दुसरीकडे, घानाचा विश्वचषकातील प्रवास राऊंड ऑफ ३२ मध्येच संपुष्टात आला.