रत्नागिरी : रत्नागिरी जिल्ह्यातील खेडमध्ये मन हेलावून टाकणारी घटना घडली आहे. मडगावहून मुंबईतील छत्रपती शिवाजी महाराज टर्मिनसकडे (Chhatrapati Shivaji Maharaj Terminus - CSMT) जाणाऱ्या मांडवी एक्स्प्रेसमधून (Mandovi Express) एका पुरुषाने लिव्ह-इन संबंधात (Live-in Relationship) राहणाऱ्या महिलेसह आणि त्यांच्या दीड वर्षांच्या मुलाला घेऊन धावत्या रेल्वेतून (Train) उडी मारल्याची धक्कादायक घटना समोर आली आहे. या घटनेत महिलेचा मृत्यू झाला असून पुरुष आणि चिमुकला गंभीर जखमी झाले आहेत.
मिळालेल्या माहितीनुसार, खेड तालुक्यातील मेटे गावाजवळ कोकण रेल्वे (Konkan Railway) मार्गावर शुक्रवारी सायंकाळी साडेसहा वाजण्याच्या सुमारास हा प्रकार घडला. या दुर्घटनेत शुभ्रा अतिश दिवेकर यांचा जागीच मृत्यू झाला. तर सचिन सत्यवान जुवळे आणि त्यांचा दीड वर्षांचा मुलगा गंभीर जखमी झाले असून त्यांच्यावर रुग्णालयात (Hospital) उपचार सुरू आहेत.
सचिन जुवळे, शुभ्रा दिवेकर आणि त्यांचा मुलगा हे तिघे मडगावहून मुंबईकडे जाणाऱ्या मांडवी एक्स्प्रेसने (Mandovi Express) प्रवास करत होते. खेड तालुक्यातील मेटे गावाजवळ रेल्वे पोहोचताच त्यांनी धावत्या रेल्वेतून उडी मारल्याची माहिती समोर आली आहे.
घटनेनंतर रेल्वेतील प्रवाशांनी तातडीने रेल्वे पोलिसांना (Railway Police) माहिती दिली. माहिती मिळताच पोलिसांनी घटनास्थळी धाव घेत तिघांनाही कळंबणी उपजिल्हा रुग्णालयात दाखल केले. मात्र, डॉक्टरांनी शुभ्रा दिवेकर यांना मृत घोषित केले. त्यांच्या मृतदेहाचे शवविच्छेदन (Postmortem) करण्यात येत असून सचिन जुवळे आणि त्यांच्या मुलावर उपचार सुरू आहेत.
टोकाचे पाऊल का उचलले?
तिघांनी धावत्या रेल्वेतून उडी का मारली, याचे नेमके कारण अद्याप स्पष्ट झालेले नाही. कौटुंबिक वाद, मानसिक ताण (Mental Stress) किंवा इतर कोणते कारण यामागे आहे का, याचा तपास सुरू आहे. प्राथमिक माहितीनुसार हा आत्महत्येचा प्रयत्न (Suicide Attempt) असावा, असा अंदाज व्यक्त करण्यात येत आहे. मात्र, घटनेमागील नेमके कारण शोधण्यासाठी खेड पोलीस (Police) सखोल तपास करत आहेत.