मुंबई : मराठी चित्रपटसृष्टीतील (Marathi Film Industry) चर्चेत असलेल्या ‘देऊळ बंद २’ (Deool Band 2) या चित्रपटाला बॉलिवूडचा (Bollywood) ‘किंग खान’ अभिनेता शाहरुख खान (Shah Rukh Khan) याने दिलेल्या मदतीमुळे सोशल मीडियावर (Social Media) मोठी चर्चा रंगली आहे. काही नेटकऱ्यांनी शाहरुख खानने हिंदू देवतेवर आधारित चित्रपटाला मदत का केली, असा सवाल उपस्थित करत ट्रोलिंग (Trolling) सुरू केले. मात्र या टीकेला चित्रपटाचे लेखक-दिग्दर्शक प्रवीण तरडे (Pravin Tarde) यांनी स्पष्ट शब्दांत उत्तर दिलं आहे.
एका मुलाखतीत प्रवीण तरडेंनी सांगितलं की, ‘देऊळ बंद २’च्या प्रदर्शनासाठी आवश्यक असलेल्या डीसीपी (DCP - Digital Cinema Package) संदर्भात त्यांची आर्थिक अडचण होती. चित्रपटासाठी जवळपास ४३ लाख रुपयांचं बिल होतं, मात्र त्यांच्याकडे त्या वेळी फक्त १२ ते १३ लाख रुपये उपलब्ध होते.
तरडे म्हणाले, “आम्ही शाहरुख खान यांच्या कंपनीकडे मदतीसाठी गेलो. त्यांनी त्यांच्या टीमला विचारलं की, हा चित्रपट कसा आहे? टीमने चित्रपट चांगला असल्याचं सांगितलं. त्यानंतर त्यांनी लगेच डीसीपी देण्यास सांगितलं आणि पैशांचा हिशोब नंतर पाहू असं स्पष्ट केलं. आमचा चित्रपट प्रदर्शनासाठी पूर्णपणे तयार होता. हा एखाद्याच्या मनाचा मोठेपणा नाही का?”
‘हिंदू-मुस्लीम हा प्रश्नच नाही’
शाहरुख खानवर धर्माच्या आधारावर टीका करणाऱ्यांना उत्तर देताना प्रवीण तरडे म्हणाले, “यात हिंदू-मुस्लीम (Hindu-Muslim) हा मुद्दा कुठून आला? आम्ही दोघेही फिल्म इंडस्ट्रीचा भाग आहोत. एखाद्याने मोठ्या मनाने मदत केली तर त्याचा धर्म पाहून त्याच्या चांगुलपणाकडे दुर्लक्ष करायचं का? मदत करणाऱ्या व्यक्तीचे आभार मानणं हे स्वाभाविक आहे.” ते पुढे म्हणाले, “माझ्या हिंदुत्ववादी (Hindutva) विचारसरणीचा आणि शाहरुख खानचे आभार मानण्याचा काहीही संबंध नाही. चांगला माणूस हा चांगलाच असतो.”
‘देऊळ बंद २’चा बॉक्स ऑफिसवर (Box Office) विक्रम
प्रवीण तरडे लिखित आणि दिग्दर्शित ‘देऊळ बंद २’ (Deool Band 2) हा चित्रपट बॉक्स ऑफिसवर प्रचंड यशस्वी ठरला आहे. या चित्रपटाने १०० कोटी रुपयांहून अधिक कमाई करत मराठी चित्रपटसृष्टीत नवा विक्रम केला आहे. रितेश देशमुख (Riteish Deshmukh) यांच्या ‘राजा शिवाजी’ (Raja Shivaji) नंतर १०० कोटींचा टप्पा पार करणारा हा दुसरा मराठी चित्रपट ठरला आहे. शाहरुख खानने केलेल्या मदतीची माहिती समोर आल्यानंतर सोशल मीडियावर वेगवेगळ्या प्रतिक्रिया उमटत असल्या, तरी प्रवीण तरडे यांनी “मदतीला धर्माची सीमा नसते” हा संदेश ठामपणे मांडला आहे.