Nashik : महाराष्ट्र राज्य जलतरण संघटना (Maharashtra State Swimming Association) आणि नाशिक जिल्हा जलतरण संघटना (Nashik District Swimming Association) यांच्या संयुक्त विद्यमाने महाराष्ट्र राज्य वयोगट जलतरण स्पर्धेचे आयोजन १८ ते २० जुलैदरम्यान नाशिक रोड येथील जिजामाता आंतरराष्ट्रीय जलतरण तलाव येथे करण्यात आले आहे.
जिल्ह्याला राज्यस्तरीय स्पर्धेच्या आयोजनाची संधी
महत्त्वाचे म्हणजे मागील १४ वर्षांनंतर प्रथमच नाशिक जिल्ह्याला या राज्यस्तरीय स्पर्धेच्या आयोजनाची संधी मिळाली आहे. स्पर्धेत महाराष्ट्रातील २७ जिल्ह्यांतील ११ ते १७ वयोगटातील सुमारे ६०० ते ७०० खेळाडू सहभागी होणार असून, चार विविध वयोगटांतील मुले-मुलींसह राष्ट्रीय व आंतरराष्ट्रीय स्तरावरील नामांकित जलतरणपटूंचाही सहभाग असणार आहे. स्पर्धेला १८ जुलै रोजी सकाळी ९ वाजता प्रारंभ होईल.
स्पर्धेचे थेट प्रक्षेपण यूट्यूबवर होणार
स्पर्धेचे थेट प्रक्षेपण यूट्यूबवर करण्यात येणार असून, इलेक्ट्रॉनिक टचपॅड व एलईडी स्क्रीनद्वारे निकाल प्रदर्शित केले जाणार आहेत. अंतिम फेरीत निवड झालेले ज्युनिअर गटातील खेळाडू भुवनेश्वर, तर सब-ज्युनिअर गटातील खेळाडू जयपूर येथे होणाऱ्या राष्ट्रीय स्पर्धेत सहभागी होतील.
सर्व खेळाडूंची उपस्थिती नोंदणी १७ जुलै रोजी दुपारी ४ वाजता स्पर्धास्थळी होईल, अशी माहिती महाराष्ट्र राज्य जलतरण संघटनेचे सचिव राजेंद्र पालकर तसेच घनश्याम कुंवर(Ghanshyam Kunwar) यांनी दिली. १४ वर्षांनंतर नाशिकमध्ये राज्यस्तरीय स्पर्धा होत असल्याचा अभिमान असल्याची भावना महाराष्ट्र राज्य जलतरण संघटनेचे (Maharashtra State Swimming Association) अध्यक्ष विश्वकर्मा शार्दुल (Vishwakarma Shardul) यांनी व्यक्त केली.