दिल्ली : दिल्लीत नेमकं चालंय तरी काय? गेल्या अनेक दिवसांपासून दिल्ली शहरात गुन्हेगारीचे प्रमाण वाढत चालले आहे अशातच एका पोलीस कॉन्स्टेबलने आपल्या पत्नीची हत्या केल्याचे घटना समोर आली आहे. दिल्लीच्या पूर्व भागातील कल्याणपुरी परिसरात ही धक्कादायक घटना घडली आहे. पतीने आपल्या पत्नीच्या वाढदिवशीच तिची हत्या केली आहे.
मिळालेल्या माहितीनुसार, आरोपी मनीष भाटी हे दिल्ली पोलिसांच्या पूर्व जिल्ह्यातील वाहनचोरी प्रतिबंधक पथकात कार्यरत आहेत. पोलिसांच्या प्राथमिक माहितीनुसार, सोमवारी पहाटे सुमारे ३ वाजता लाल बहादूर शास्त्री (एलबीएस) रुग्णालयाजवळ त्यांनी पत्नी प्रियांका यांच्यावर गोळी झाडली आणि घटनास्थळावरून पसार झाले.
मनीष आणि प्रियांका यांचे तीन वर्षांपूर्वी लग्न झाले होते. ते विनोद नगर परिसरात राहत होते. सीसीटीव्ही फुटेजमध्ये दोघेही पहाटे २ वाजण्याच्या सुमारास स्कूटरवरून घराबाहेर पडल्याचे दिसून आले आहे. एलबीएस रुग्णालयाजवळ त्यांच्यात वाद झाल्यानंतर ही घटना घडल्याचा संशय पोलिसांनी व्यक्त केला आहे.
गोळीबारानंतर जखमी अवस्थेत रस्त्यावर पडलेल्या प्रियांका यांना एका ऑटोचालकाने रुग्णालयात दाखल केले. मात्र, डॉक्टरांनी त्यांना मृत घोषित केले.
घटनेनंतर आरोपीचा शोध घेण्यासाठी पोलिसांनी अनेक पथके तयार केली असून, त्याच्या हालचालींचा मागोवा घेण्यासाठी सीसीटीव्ही फुटेजची तपासणी सुरू आहे.
दरम्यान, प्रियांका या अशोक विहार येथील एका खासगी शाळेत शिक्षिका होत्या. त्यांच्या कुटुंबीयांनी आरोपीवर हुंड्याची मागणी आणि मानसिक छळाचे आरोप केले आहेत. २०२४ मध्येही या कारणावरून दोघांमध्ये वाद झाल्यानंतर प्रियांका सुमारे आठ महिने भावाकडे राहत होत्या, अशी माहिती पोलिसांना देण्यात आली आहे.
या प्रकरणाचा पुढील तपास सुरू असून आरोपीचा शोध घेण्यासाठी पोलिसांकडून व्यापक मोहीम राबवली जात आहे.