- ठाणे-पनवेलसह 'या' शहरांचा समावेश
मुंबई : स्वतःच्या हक्काच्या घराची वाट पाहणाऱ्या लाखो नागरिकांसाठी मोठी आनंदाची बातमी आहे. म्हाडाच्या कोकण मंडळामार्फत सुमारे ५ हजार घरांची मेगा लॉटरी लवकरच जाहीर होणार असून, ऑगस्टच्या अखेरीस किंवा सप्टेंबरच्या पहिल्या आठवड्यात या लॉटरीची जाहिरात प्रसिद्ध होण्याची शक्यता आहे. या लॉटरीत ठाणे, कल्याण, डोंबिवली, पनवेल आणि वसई-विरार परिसरातील घरे उपलब्ध होणार आहेत. त्यामुळे मुंबई महानगर प्रदेशातील मध्यमवर्गीय आणि सर्वसामान्य नागरिकांना परवडणाऱ्या दरात घर खरेदी करण्याची मोठी संधी मिळणार आहे. (MHADA Lottery 2026)
खासगी विकसकांकडून मिळालेली हजारो घरे :
या लॉटरीतील मोठ्या प्रमाणातील घरे खासगी विकसकांकडून २० टक्के गृहनिर्माण धोरणाअंतर्गत म्हाडाकडे हस्तांतरित झाली आहेत. सध्या म्हाडाकडे जवळपास १,००० घरे उपलब्ध असून, ठाणे, कल्याण, डोंबिवली, पनवेल आणि वसई-विरार परिसरातून आणखी सुमारे ४,००० घरे उपलब्ध करून घेण्याची प्रक्रिया अंतिम टप्प्यात आहे. (MHADA Lottery 2026)
मागील लॉटरीला ७५ हजार अर्ज :
यापूर्वी म्हाडाच्या मुंबई मंडळाने २,६४० घरांसाठी लॉटरी काढली होती. या लॉटरीसाठी तब्बल ७५ हजार अर्ज प्राप्त झाले होते. मात्र, घरांच्या तुलनेने जास्त किमतींमुळे अपेक्षित प्रमाणात प्रतिसाद मिळाला नव्हता. त्यामुळे आता नागरिकांचे लक्ष कोकण मंडळाच्या आगामी लॉटरीकडे लागले आहे. (MHADA Lottery 2026)
मध्यमवर्गीयांसाठी सुवर्णसंधी :
मुंबई आणि उपनगरांतील घरांच्या सातत्याने वाढणाऱ्या किमतीमुळे स्वतःचे घर घेणे अनेकांसाठी कठीण झाले आहे. अशा परिस्थितीत म्हाडाची लॉटरी ही परवडणाऱ्या किमतीत घर मिळवण्याची मोठी संधी मानली जाते. आता लॉटरीची अधिकृत घोषणा, अर्ज प्रक्रिया, घरांच्या किमती आणि आरक्षणाची माहिती कधी जाहीर होते, याकडे घर खरेदी करू इच्छिणाऱ्या नागरिकांचे लक्ष लागले आहे. (MHADA Lottery 2026)