नवी दिल्ली : चालू आर्थिक वर्ष 2026-27 मध्ये 13 जुलैपर्यंतचे निव्वळ प्रत्यक्ष कर संकलन 16.40 टक्क्यांनी वाढून 6.51 लाख कोटी रुपयांहून अधिक झाले आहे. यामध्ये कॉर्पोरेट कर संकलनाचे महत्त्वपूर्ण योगदान राहिले आहे. या कालावधीत निव्वळ कॉर्पोरेट कर संकलन 22 टक्क्यांनी वाढून 2.40 लाख कोटी रुपये झाले. तसेच, एकूण प्रत्यक्ष कर संकलन 16.11 टक्क्यांच्या वाढीसह 7.73 लाख कोटी रुपयांहून अधिक झाले आहे.
आयकर विभागाने मंगळवारी आकडेवारीद्वारे माहिती दिली की, बिगर-कॉर्पोरेट कर (NCT) मधून महसूल संकलन सुमारे 12 टक्क्यांनी वाढून 3.84 लाख कोटी रुपयांहून अधिक झाले आहे. या कालावधीत सरकारने 1.22 लाख कोटी रुपयांचे कर परतावे (Refund) जारी केले असून, ते मागील वर्षीच्या याच कालावधीच्या तुलनेत 14.57 टक्के अधिक आहेत. आयकर विभागाच्या माहितीनुसार, एकूण आधारावर प्रत्यक्ष कर संकलनही 16.11 टक्क्यांनी वाढून 7.73 लाख कोटी रुपयांहून अधिक झाले आहे. यामध्ये कॉर्पोरेट करातून 3.35 लाख कोटी रुपयांहून अधिक आणि बिगर-कॉर्पोरेट करातून सुमारे 4.12 लाख कोटी रुपयांचा समावेश आहे.
आयकर विभागाने सांगितले की, 13 जुलैपर्यंत चालू आर्थिक वर्ष 2026-27 साठीच्या एकूण प्रत्यक्ष कर (डीटी) संकलन, कर परतावे (रिफंड) आणि निव्वळ प्रत्यक्ष कर (DT) संकलनाची आकडेवारी जाहीर करण्यात आली आहे. ही माहिती आयकर विभागाच्या राष्ट्रीय संकेतस्थळावरील संबंधित लिंकवर उपलब्ध आहे. केंद्र सरकारने चालू आर्थिक वर्ष 2026-27 च्या केंद्रीय अर्थसंकल्पात 26.97 लाख कोटी रुपयांच्या प्रत्यक्ष कर संकलनाचे लक्ष्य निश्चित केले आहे. हे आर्थिक वर्ष 2025-26 मध्ये संकलित करण्यात आलेल्या 23.40 लाख कोटी रुपयांच्या तुलनेत 15 टक्के अधिक आहे.