Nashik Kumbh Mela : सिंहस्थ कुंभमेळा २०२७च्या पार्श्वभूमीवर राज्य शासनाने मोठा निर्णय घेत कुंभमेळ्यासाठी स्वतंत्र उपजिल्हाधिकारी पद निर्माण करण्यास मंजुरी दिली आहे. तात्पुरत्या स्वरुपात हे उपजिल्हाधिकारी (वर्ग अ) संवर्गातील पद निर्माण करण्यात येणार असून याबाबतचा शासन निर्णय काढण्यात आला आहे. दरम्यान, नाशिकसाठी कायमस्वरूपी स्वागत अधिकारी नियुक्त करण्याची जिल्हा प्रशासनाची मागणी शासनाने फेटाळली आहे.
१२ वर्षानंतर होणारा सिंहस्थ कुंभमेळा हा अनेक कारणांमुळे महत्त्वाचा असतो. त्यामुळे लाखो लोक कुंभमेळ्यात सहभागी होतात. त्यामुळे होणारी गर्दी लक्षात घेता तिचे नियोजन करणे प्रशासनासाठी तारेवरची कसरत ठरते. तर अतिमहत्त्वाच्या व्यक्तींच्या (VVIP) प्रोटोकॉलची जबाबदारी सक्षमपणे पार पाडण्यासाठी राज्य शासनाने उपजिल्हाधिकारी दर्जाच्या स्वागत अधिकारी पदास मंजुरी दिली आहे.
महत्त्वाचे म्हणजे, कुंभमेळ्याच्या पार्श्वभूमीवर निर्माण करण्यात येणारे उपजिल्हाधिकारीपद, हे केवळ १ ऑगस्ट २०२६ ते ३१ ऑगस्ट २०२८ या दोन वर्षांच्या कालावधीपुरतेच मर्यादित राहणार आहे. सिंहस्थ कुंभमेळ्यादरम्यान देश-विदेशातील अतिमहत्त्वाच्या व्यक्ती, मान्यवर आणि विविध शासकीय प्रतिनिधींच्या वाढत्या भेटींचे नियोजन, प्रोटोकॉल व समन्वय प्रभावीपणे करण्याच्या उद्देशाने हा निर्णय घेण्यात आला आहे.
या पदासाठी सातव्या वेतन आयोगानुसार एस-२० वेतनश्रेणी लागू राहणार असून, वार्षिक अंदाजित खर्च सुमारे १४.०१ लाख रुपये इतका अपेक्षित आहे. शासन निर्णयानुसार हे पद केवळ सिंहस्थ कुंभमेळ्याच्या कालावधीपुरतेच अस्तित्वात राहील. ३१ ऑगस्ट २०२८ नंतर हे तात्पुरते पद आपोआप रद्द होऊन त्याऐवजी पूर्वीप्रमाणे स्वागत अधिकारी (वर्ग-३) हे पद पुन्हा कार्यरत राहील.