मुंबई : टी-२० क्रिकेटच्या इतिहासात असा सामना पाहायला मिळाला, ज्याने या फॉरमॅटमधील (Format) जवळपास सगळे मोठे विक्रम (Records) मोडीत काढले. मेजर क्रिकेट लीग (Major Cricket League - MLC) २०२६ मधील एलिमिनेटर-१ सामन्यात धावांचा अक्षरशः पाऊस पडला. या सामन्यात तब्बल ५३७ रन, ५१ सिक्स (Sixes) आणि ३ शतकं (Centuries) पाहायला मिळाली.
ऑकलंडमध्ये झालेल्या या सामन्यात एमआय न्यूयॉर्क (MI New York) आणि वॉशिंग्टन फ्रीडम (Washington Freedom) आमनेसामने होते. प्रथम फलंदाजी करताना एमआय न्यूयॉर्कने २० ओव्हरमध्ये २६६/९ रन उभे केले. या विशाल लक्ष्याचा पाठलाग करताना वॉशिंग्टन फ्रीडमने अवघ्या १८.४ ओव्हरमध्ये २७०/४ रन करत ६ विकेट्सने विजय मिळवला.
यासोबतच वॉशिंग्टन फ्रीडमने टी-२० क्रिकेटमधील (T20 Cricket) सर्वात मोठ्या रन चेसचा (Run Chase) विक्रम आपल्या नावावर केला. याआधी हा विक्रम पंजाब किंग्सच्या नावावर होता. आयपीएल २०२६ मध्ये दिल्ली कॅपिटल्सविरुद्ध पंजाबने २६५ रनचा यशस्वी पाठलाग केला होता.
निकोलस पूरनचं वादळ, पोलार्डचा सिक्सचा विक्रम
एमआय न्यूयॉर्ककडून खेळताना निकोलस पूरनने (Nicholas Pooran) अवघ्या ३१ बॉलमध्ये शतक (Century) ठोकत एमएलसी इतिहासातील सर्वात जलद शतकाचा विक्रम केला. पूरनने १०६ रनची तुफानी इनिंग (Innings) खेळली. याच सामन्यात कायरन पोलार्डने (Kieron Pollard) २५ बॉलमध्ये ६४ रन करत टी-२० क्रिकेट कारकिर्दीतील १ हजार सिक्स पूर्ण केले. क्विंटन डिकॉकनेही (Quinton de Kock) शानदार अर्धशतक (Half Century) झळकावलं.
एका टप्प्यावर एमआय न्यूयॉर्कचा स्कोअर १३ ओव्हरमध्ये २११/३ असा होता. त्यावेळी टीम ३०० रनचा टप्पा पार करेल असं वाटत होतं. मात्र शेवटच्या ओव्हरमध्ये रचिन रवींद्रने (Rachin Ravindra) ४ विकेट घेत एमआय न्यूयॉर्कला २६६ रनवर रोखलं.
सुरुवात खराब, पण स्मिथ-गॉसने रचला इतिहास
२६७ रनच्या लक्ष्याचा पाठलाग करताना वॉशिंग्टन फ्रीडमची सुरुवात खराब झाली. अवघ्या १० रनवर टीमने २ विकेट गमावल्या. शाकिब अल हसनने (Shakib Al Hasan) नवीन बॉलने दोन मोठे धक्के दिले. मात्र त्यानंतर एंड्रीस गॉस (Andries Gous) आणि कर्णधार स्टीव्ह स्मिथ (Steve Smith) यांनी सामन्याचा कायापालट केला. दोघांनी तिसऱ्या विकेटसाठी ८९ बॉलमध्ये २४१ रनची विक्रमी पार्टनरशिप (Partnership) केली. गॉसने ५६ बॉलमध्ये १३२ रन, तर स्मिथने ४९ बॉलमध्ये नाबाद ११० रनची खेळी केली. दोघांनीही अवघ्या ४०-४० बॉलमध्ये शतक पूर्ण केलं.
एका सामन्यात ३ शतकांचा विक्रम
पुरुषांच्या टी-२० क्रिकेटमध्ये पहिल्यांदाच एका सामन्यात ३ खेळाडूंनी शतकं ठोकण्याचा विक्रम झाला.
- निकोलस पूरन – १०६ रन
- एंड्रीस गॉस – १३२ रन
- स्टीव्ह स्मिथ – नाबाद ११० रन
एका सामन्यात तुटलेले मोठे विक्रम
- एकाच सामन्यात ५३७ रन
- दोन्ही टीमकडून मिळून ५१ सिक्स
- २६७ रनचा यशस्वी रन चेस
- एकाच सामन्यात ३ शतकं
- एंड्रीस गॉस – एमएलसीमध्ये शतक करणारा पहिला अमेरिकन खेळाडू
- कायरन पोलार्ड – टी-२० क्रिकेटमध्ये १ हजार सिक्स पूर्ण
- गॉस-स्मिथची २४१ रनची पार्टनरशिप – टी-२० इतिहासातील संयुक्तरित्या दुसरी सर्वात मोठी पार्टनरशिप