महापालिका सभागृहात ठराव मंजूर
मुंबई : मुंबई महानगरपालिकेच्या (BMC) सभागृहातील कामकाजाचे थेट प्रक्षेपण करण्यात येत असून सभागृहातील कामकाजात नगरसेवकांचा वाढलेला प्रतिसाद पाहता आता सभागृहाच्या धर्तीवर वैधानिक समितीच्या सभेचेही यूट्युब चॅनेलच्या माध्यमातून थेट प्रक्षेपण केले जाणार आहे. याबाबतचा ठराव महापालिका सभागृहात मंजूर करण्यात आला आहे.
महापालिका सभेच्या कामकाजाचे थेट प्रक्षेपण युट्युब (YouTube) या प्रसार माध्यमाच्या मार्फत नागरिकांना नियमित पाहण्यास उपलब्ध करून देण्यात आले आहे. त्याच धर्तीवर वैधानिक समितींच्या सभा ज्या सभागृहात होतात त्या सभांच्या कामकाजांचे थेट प्रक्षेपण युट्युब ह्या प्रसार माध्यमाच्या मार्फत नागरिकांना नियमित पाहण्यास उपलब्ध करून देण्याची मागणी नगरसेवक सचिन पडवळ यांनी ठरावाच्या सूचनेद्वारे केली होती. हा ठराव महापालिका सभागृहात मंजूर करण्यात आला.
पडवळ यांनी असे नमुद केले आहे की मुंबई ही देशाची आर्थिक राजधानी असून संपूर्ण देशाचे नव्हे तर जगाचे लक्ष मुंबई महानगरपालिकेवर असते. मुंबई महानगरपालिकेच्या सभागृहात जे कामकाज चालते त्याचे थेट प्रक्षेपण नागरिकांना दाखविले जाते. त्याचप्रमाणे मुंबई शहरामध्ये प्रशासनाचे कामकाज हाताळण्यासाठी स्थायी समिति, शिक्षण समिति, सुधार समिति, 'बेस्ट' समिति ह्या वैधानिक समित्या अस्तित्वात असून ह्या समित्यांमध्ये आयुक्तांपासून अतिरिक्त आयुक्त, महानगरपालिका उपायुक्त, संबंधित विभागांचे प्रमुख अधिकारी तसेच या समित्यांचे सदस्य उपस्थित असतात. मुंबईच्या दृष्टिकोनातून या समित्यांचे कसे कामकाज चालते, नागरिकांनी निवडून दिलेले नगरसेवक कसे कामकाज करतात, मुंबई शहरासाठी कोणते प्रश्न मांडतात, प्रशासन त्या प्रश्नांवर कोणती उपाययोजना करतात हे मुंबईकर जनतेला समजणे गरजेचे आहे असे म्हटले आहे.