अहमदाबाद : गुजरातमधील वलसाड जिल्ह्यात मंगळवारी सकाळी मोठी दुर्घटना टळली. उमरगाम तालुक्यातील भिलाड रेल्वे स्टेशनजवळ विरारहून भरूचकडे जाणाऱ्या MEMU ट्रेनची चार चाके अचानक रुळावरून घसरली. सुदैवाने या घटनेत कोणतीही जीवितहानी झाली नाही. (MEMU Train Accident)
मिळालेल्या माहितीनुसार, ट्रेन क्रमांक १९१०१ विरार-भरूच MEMU भिलाड रेल्वे स्थानकाच्या प्लॅटफॉर्म क्रमांक १ वर येत असताना सकाळी सुमारे ६ वाजून २७ मिनिटांनी हा प्रकार घडला. ट्रेनच्या पुढील बाजूच्या DMC कोचची चार चाके रुळावरून घसरली. हा DMC कोच म्हणजे चालक ज्या डब्यातून ट्रेन चालवतो तो भाग असून तो इंजिनप्रमाणे कार्य करतो. (MEMU Train Accident)
घटना घडताच स्टेशन परिसरात एकच गोंधळ उडाला. अचानक ट्रेनचा डबा रुळावरून घसरल्याने प्रवाशांमध्ये काही काळ भीतीचे वातावरण निर्माण झाले. मात्र, रेल्वे कर्मचाऱ्यांच्या तत्परतेमुळे परिस्थिती नियंत्रणात आणण्यात आली. घटनेची माहिती मिळताच पश्चिम रेल्वेच्या मुंबई सेंट्रल विभागातील अधिकारी, तांत्रिक पथक आणि बचाव पथक तातडीने घटनास्थळी दाखल झाले. वलसाड येथून अपघात निवारण पथक (Accident Relief Team) आणि वैद्यकीय मदत पथकही रवाना करण्यात आले. (MEMU Train Accident)
रेल्वे प्रशासनाने दिलेल्या माहितीनुसार, या दुर्घटनेत कोणताही प्रवासी किंवा रेल्वे कर्मचारी जखमी झालेला नाही. सध्या रुळावरून घसरलेली चाके पुन्हा रुळावर आणण्याचे काम युद्धपातळीवर सुरू आहे. या घटनेचा परिणाम मुंबई-अहमदाबाद रेल्वे मार्गावरील वाहतुकीवर झाला असून काही गाड्या उशिराने धावण्याची शक्यता आहे. ट्रेनची चाके नेमकी कोणत्या कारणामुळे रुळावरून घसरली, याचा तपास रेल्वे प्रशासनाकडून सुरू करण्यात आला आहे. तांत्रिक तपासणीनंतर अपघाताचे खरे कारण स्पष्ट होणार आहे. (MEMU Train Accident)