राजकोट : गुजरात मधील राजकोट येथील १५० फीट रिंग रोडवरील आंबेडकर चौकाजवळ एक अत्यंत भीषण अपघात घडल्याची घटना समोर आली आहे. रस्ता ओलांडणाऱ्या एका वृद्ध महिलेला भरधाव वेगात येणाऱ्या ऑटो-रिक्षाने जोरात धडक दिली. ही धडक एवढी जोरदार होती की, वृद्ध महिला हवेत उडून रस्त्यावर दूर फेकली गेली. या संपूर्ण अपघाताचा अंगावर काटा आणणारा थरार तेथील एका सीसीटीव्ही (CCTV) कॅमेऱ्यामध्ये स्पष्टपणे कैद झाला आहे.
मिळालेल्या माहितीनुसार, वृद्ध महिला रस्ता ओलांडत असताना रिक्षाचालकाचे वाहनावरील नियंत्रण सुटल्यामुळे हा भीषण अपघात घडला. धडक इतकी तीव्र होती की, रस्त्यावरून जाणाऱ्या महिलेसोबतच रिक्षाच्या आत बसलेला एक प्रवासीसुद्धा हवेत उडून थेट रस्त्यावर आदळला. अपघाताचा हा भीषण देखावा पाहून परिसरातील उपस्थितांमध्ये मोठी धावपळ आणि खळबळ उडाली.
या अपघातात वृद्ध महिला गंभीररीत्या जखमी झाली आहे. घटनेनंतर लगेचच स्थानिक नागरिक आणि प्रत्यक्षदर्शींनी मदतीसाठी धाव घेतली. अत्यंत गंभीर अवस्थेत असलेल्या या महिलेला तातडीने उपचारासाठी जवळच्या सिव्हिल रुग्णालयात दाखल करण्यात आले असून तेथे त्यांच्यावर उपचार सुरू आहेत. घटनेची माहिती मिळताच स्थानिक पोलिसांनी घटनास्थळी पोहचून पाहणी केली. सध्या पोलीस सीसीटीव्ही फुटेजच्या आधारे या प्रकरणाचा पुढील तपास करत आहेत.