दोषींवर कठोर कारवाईचे मुख्यमंत्र्यांचे आदेश
मुंबई : भिवंडी येथे घडलेल्या भीषण इमारत दुर्घटनेनंतर राज्याचे जलसंपदा व आपत्ती व्यवस्थापन मंत्री गिरीश महाजन यांनी शुक्रवारी घटनास्थळाला भेट देऊन परिस्थितीचा प्रत्यक्ष आढावा घेतला. या दुर्घटनेतील मृतांच्या नातेवाईकांना राज्य शासनाच्या वतीने प्रत्येकी ५ लाख रुपयांची आर्थिक मदत मंत्री महाजन यांनी जाहीर केली. तसेच या दुर्घटनेप्रकरणी तत्काळ गुन्हा दाखल करून दोषींवर कठोर कारवाई करण्याचे आदेश मुख्यमंत्री देवेंद्र फडणवीस यांनी महापालिका आयुक्तांना दिले आहेत.
घटनास्थळी भेट दिल्यानंतर मंत्री गिरीश महाजन यांनी जिल्हा प्रशासनाकडून बचाव व मदतकार्याची सविस्तर माहिती घेतली. आपत्तीग्रस्तांना तातडीने सर्वतोपरी मदत उपलब्ध करून देण्याचे निर्देश त्यांनी संबंधित यंत्रणांना दिले. या दुर्घटनेबाबत मुख्यमंत्री देवेंद्र फडणवीस यांच्याशी चर्चा झाली असून, शासनाकडून सर्वतोपरी मदत करण्याचे निर्देश मुख्यमंत्र्यांनी दिल्यांचे महाजन यांनी सांगितले. दुर्घटनेतील जखमींवर शासकीय खर्चाने सर्वोत्तम वैद्यकीय उपचार केले जातील, अशी ग्वाहीही त्यांनी दिली.
सुरक्षेचा उपाय म्हणून दुर्घटनाग्रस्त इमारतीच्या शेजारील इमारतींमधील नागरिकांना सुरक्षित स्थळी हलवण्यात आले असून, त्यांच्या राहण्याची व भोजनाची योग्य व्यवस्था करण्याचे आदेश प्रशासनाला देण्यात आले आहेत. आपत्तीच्या काळात सर्व शासकीय यंत्रणांनी परस्परांमध्ये समन्वय ठेवून काम करावे, असे आवाहनही महाजन यांनी केले.
दरम्यान, भिवंडीतील इमारत दुर्घटना अत्यंत दुर्दैवी असून मृतांच्या कुटुंबीयांच्या दुःखात शासन पाठीशी आहे, अशा शब्दांत मुख्यमंत्री देवेंद्र फडणवीस यांनी संवेदना व्यक्त केल्या. याप्रकरणी निष्काळजीपणा करणाऱ्यांवर तत्काळ गुन्हे नोंदवून कठोर कारवाई करण्याचे आदेश त्यांनी प्रशासनाला दिले आहेत.
या पाहणीवेळी स्थानिक खासदार सुरेश म्हात्रे, माजी मंत्री कपिल पाटील, आमदार महेश चौगुले, महापौर नारायण चौधरी, जिल्हाधिकारी श्रीकांत पांचाळ यांच्यासह पालिका आणि आपत्ती व्यवस्थापन विभागाचे वरिष्ठ अधिकारी उपस्थित होते.