प्राथमिक माहितीनुसार, दक्षिण काश्मीरमधील कुलगाम जिल्ह्यातील केलम परिसरात दहशतवाद्यांनी दोन स्थलांतरित मजुरांना अडवले. त्यानंतर त्यांची ओळख आणि धर्म विचारल्यानंतर त्यांच्यावर गोळीबार करण्यात आल्याची माहिती जम्मू-काश्मीर पोलिसांनी दिली आहे. या हल्ल्यानंतर परिसरात एकच खळबळ उडाली. (Kulgam)
घटनेची माहिती मिळताच पोलीस आणि सुरक्षा दलाचे जवान घटनास्थळी दाखल झाले. संपूर्ण परिसर सील करून दहशतवाद्यांचा शोध घेण्यासाठी मोठ्या प्रमाणावर शोधमोहीम सुरू करण्यात आली आहे. जम्मू-काश्मीरचे पोलीस महासंचालक नलिन प्रभात यांनी दोन्ही मजूर छत्तीसगडमधील असल्याची माहिती दिली. (Jammu Kashmir)
या हल्ल्यामागे पाकिस्तान समर्थित दहशतवादी संघटनेचा हात असल्याचा संशय सुरक्षा यंत्रणांनी व्यक्त केला आहे. प्राथमिक तपासात मोहम्मद लतीफ या संशयिताचे नाव समोर आले आहे. तो गेल्या वर्षी लष्कर-ए-तोयबा आणि द रेसिस्टन्स फ्रंट (TRF) या दहशतवादी संघटनांशी जोडला गेल्याची माहिती समोर आली आहे. मात्र, या प्रकरणाचा तपास अद्याप सुरू असून अधिकृत तपास पूर्ण होणे बाकी आहे. (Kashmir News)
पलगाम हल्ल्यात २६ जणांचा मृत्यू
गेल्या काही वर्षांत जम्मू-काश्मीरमध्ये स्थलांतरित मजूर आणि पर्यटकांना लक्ष्य करून हल्ले झाल्याच्या अनेक घटना घडल्या आहेत. एप्रिल 2025 मध्ये पहलगाम येथे पर्यटकांवर झालेल्या हल्ल्यात 26 जणांचा मृत्यू झाला होता. त्याआधी ऑक्टोबर 2024 मध्ये गांदरबल येथे सुरू असलेल्या बोगदा प्रकल्पावरील मजुरांवर गोळीबार करण्यात आला होता. तसेच 2024 मध्ये अनंतनाग आणि श्रीनगरमध्येही बाहेरील राज्यांतील मजुरांवर प्राणघातक हल्ले झाल्याच्या घटना समोर आल्या होत्या. (Jammu Kashmir Attack) कुलगाममधील ताज्या घटनेनंतर सुरक्षा यंत्रणा अधिक सतर्क झाल्या असून, हल्लेखोरांचा शोध सुरू आहे.