खोपोली : खोपोलीतील गारमाळ रस्त्यावर सोमवारी दुपारी एका कारचा भीषण अपघात झाला. चालकाचे नियंत्रण सुटल्यामुळे कार थेट ५० फूट खोल दरीत कोसळली. मात्र, सुदैवाने ही कार एका झाडामध्ये जाऊन अडकली आणि एक मोठा अनर्थ टळला. कार झाडात अडकल्यामुळे चालकाचा जीव थोडक्यात वाचला आहे.
झाड ठरले देवदूत, चालकाला स्थानिकांनी काढले बाहेर!
सोशल मीडियावर या अपघाताचा एक व्हिडिओ जोरदार व्हायरल होत आहे. यामध्ये कार झाडाच्या फांद्यांमध्ये लटकलेली दिसत असून, ती खाली कोसळण्याचा धोका निर्माण झाला होता. अपघात घडताच स्थानिक नागरिकांनी तातडीने मदतीसाठी धाव घेतली आणि चालकाला सुखरूप बाहेर काढले. जर ती कार झाडात अडकली नसती, तर ती थेट खाली असणाऱ्या 'मिसिंग लिंक'च्या रस्त्यावर कोसळली असती. हा अपघात नक्की कसा झाला, याचा पोलीस अधिक तपास करत आहेत.
रील्स बनवताना पर्यटक दरीत कोसळला
खोपोलीतच घडलेल्या दुसऱ्या एका दुर्दैवी घटनेत एका २३ वर्षांच्या तरुणाचा दरीत पडून मृत्यू झाला. रविवारी पावसाळी हवामानाचा आनंद घेण्यासाठी चार मित्र खोपोलीतील प्रसिद्ध डीपी धबधब्यावर (DP Waterfall) आले होते. तेथे व्हिडिओ (Reels) बनवत असताना अचानक पाण्याचा प्रवाह वाढला आणि अभिषेक कुशवाह (वय २३) हा तरुण तोल जाऊन पाण्यात पडला व दरीत वाहून गेला.
शोधमोहीम अन् मृतदेह हाती
मित्र अचानक गायब झाल्याने घाबरलेल्या त्याच्या तीन सहकाऱ्यांनी लगेचच स्थानिक पोलिसांशी संपर्क साधून मदत मागितली. खोपोली पोलीस, आपत्ती व्यवस्थापन आणि स्थानिक बचाव पथकाने तातडीने शोधमोहीम सुरू केली. मात्र, रविवारी रात्री अंधार पडल्यामुळे आणि पावसामुळे मोहीम थांबवावी लागली होती. त्यानंतर सोमवारी सकाळी ५:३३ च्या सुमारास पुन्हा शोधमोहीम सुरू करण्यात आली आणि सकाळी ६ च्या सुमारास अभिषेकचा मृतदेह बाहेर काढण्यात यश आले. या अपघातात त्याचे इतर तीन मित्र सुरक्षित आहेत.