भारतीय अन्नसुरक्षा आणि मानके प्राधिकरणाने (FSSAI) मद्य उद्योगातील नियमभंगाविरोधात मोठी कारवाई करत महाराष्ट्रातील सहा प्रमुख मद्य उत्पादक कंपन्यांना नोटिसा बजावल्या आहेत. तपासादरम्यान कृत्रिम फ्लेवर्सचा बेकायदेशीर वापर, ग्राहकांची दिशाभूल करणारी लेबल्स आणि खोटे दावे केल्याचे आढळल्याचा आरोप करण्यात आला आहे. केंद्रीय आरोग्य आणि कुटुंब कल्याण मंत्रालयाने या कारवाईची माहिती दिली.
'या' ब्रँडवर फसाईची नजर
या कारवाईत ओल्ड मंक, मॅकडोवेल्स, बॅगपायपर, अँटिक्विटी ब्लू आणि रॉयल चॅलेंज यांसारख्या लोकप्रिय ब्रँड्सची निर्मिती करणाऱ्या कंपन्यांचा समावेश असल्याचे सांगण्यात आले आहे. याशिवाय गोव्यातील मॅडेक्सी डिस्टिलरीज अँड ब्रेव्हरीज येथेही FSSAIच्या पथकाने तपासणी करून मद्याचे नमुने जप्त केले आहेत.
तपासात अनेक उत्पादकांनी अन्नसुरक्षा नियमांचे उल्लंघन करून स्टँडर्ड अल्कोहोलिक पेयांमध्ये कृत्रिम फ्लेवर्स मिसळल्याचे समोर आले. मात्र, या कृत्रिम मिश्रणाचा उल्लेख बाटल्यांच्या लेबलवर करण्यात आला नव्हता. त्यामुळे ग्राहकांना नैसर्गिक आणि मानक दर्जाचे उत्पादन असल्याचा आभास निर्माण करून दिशाभूल करण्यात आल्याचा आरोप आहे.
तपासादरम्यान न्यूट्रल अल्कोहोलपासून तयार केलेली उत्पादने 'स्टँडर्ड रम' किंवा 'स्टँडर्ड व्हिस्की' म्हणून विकली जात असल्याचेही आढळले. तसेच 'रम फ्लेवर्ड स्पिरिट' किंवा 'व्हिस्की फ्लेवर्ड स्पिरिट' असा आवश्यक उल्लेख अनेक उत्पादनांवर टाळण्यात आल्याचे निदर्शनास आले. ओल्ड मंक रमच्या बाटल्यांवर '७ वर्षे जुनी' असल्याचा दावा करण्यात आला असला, तरी प्रत्यक्षात मॅच्युअर्ड रम स्पिरिटचे प्रमाण ५ टक्क्यांपेक्षाही कमी असल्याचा आरोप FSSAIने केला आहे.
दरम्यान, ही कारवाई संपूर्ण मद्य उद्योगाविरोधात नसून केवळ नियमांचे उल्लंघन करणाऱ्या उत्पादकांविरोधात करण्यात आल्याचे केंद्रीय आरोग्य मंत्रालयाने स्पष्ट केले आहे. FSSAIच्या सर्व मानकांचे पालन करणाऱ्या उत्पादकांना याचा कोणताही फटका बसणार नसल्याचेही मंत्रालयाने नमूद केले आहे.