मुंबई : मुंबईतील अंधेरी परिसरातील एका निवासी इमारतीत बेकायदेशीरपणे अजगर पाळल्याचा धक्कादायक प्रकार समोर आला आहे. वनविभागाने अंधेरी पोलिसांच्या मदतीने केलेल्या छाप्यात एका फ्लॅटमधून अजस्त्र अजगर जप्त केला. या घटनेमुळे सोसायटीतील रहिवाशांमध्ये एकच खळबळ उडाली आहे. ( Python Snake)
मिळालेल्या माहितीनुसार, अंधेरी पूर्वेतील गुंदवली येथील कॅलिस्टा (Callista) सोसायटीच्या आठव्या मजल्यावरील फ्लॅटमध्ये अजगर पाळला जात असल्याची गोपनीय माहिती वनविभागाला मिळाली होती. त्यानंतर वनविभागाने अंधेरी पोलिसांच्या मदतीने संबंधित फ्लॅटवर छापा टाकला. कारवाईदरम्यान घरातून अजगर सुरक्षितपणे ताब्यात घेण्यात आला. (Andheri)
विशेष म्हणजे, त्या इमारतीत राहणाऱ्या बहुतांश रहिवाशांना फ्लॅटमध्ये एवढा मोठा साप पाळण्यात आल्याची कोणतीही कल्पना नव्हती. ही माहिती समोर आल्यानंतर सोसायटीतील नागरिकांमध्ये भीतीचे वातावरण निर्माण झाले असून, इमारतीत इतका मोठा वन्य प्राणी कसा आणला गेला, याची चर्चा सुरू आहे.
वनविभागाने अजगराला ताब्यात घेऊन आवश्यक कायदेशीर प्रक्रिया सुरू केली आहे. संबंधित रहिवाशाविरोधात वन्यजीव संरक्षण कायद्यानुसार गुन्हा दाखल करण्याची प्रक्रिया सुरू असल्याची माहिती अधिकाऱ्यांनी दिली. ( Mumbai News)
वन्यजीव संरक्षण कायदा, 1972 अंतर्गत अजगराचा समावेश अनुसूची-१ (Schedule-I) मधील संरक्षित प्राण्यांमध्ये होतो. त्यामुळे अजगर पाळणे, विकत घेणे, विक्री करणे किंवा घरात ठेवणे पूर्णपणे बेकायदेशीर आहे. केवळ मान्यताप्राप्त प्राणीसंग्रहालय, बचाव केंद्र किंवा वनविभागाच्या विशेष परवानगीनेच अशा प्राण्यांची देखभाल करता येते.
या कायद्याचे उल्लंघन केल्यास संबंधित व्यक्तीला 3 ते 7 वर्षांपर्यंत कारावासाची शिक्षा होऊ शकते. तसेच 25 हजार ते 1 लाख रुपयांपर्यंत दंडाचीही तरतूद आहे. वनविभाग या प्रकरणाचा पुढील तपास करत आहे.