कोल्हापूर : लाखो विद्यार्थ्यांना शिक्षणातून प्रगतीचा राजमार्ग खुला करणारे, समाजसेवेचे ध्यास घेतलेले... शिक्षण महर्षी म्हणून ओळखले जाणारे पद्मश्री डॉ. डी. वाय. पाटील (दादा) यांचे आज म्हणजेच मंगळवार ४ ऑगस्ट २०२६ रोजी सकाळी ११ वाजून ८ मिनिटांनी ९१ व्या वर्षी निधन झाले. त्यांच्या निधनाने राज्यात आणि शैक्षणिक विश्वात शोककळा पसरली. आधारवडाचे छत्र हरपल्याची भावना व्यक्त होत आहे. वडिलांच्या जाण्यानं पहाडासारखे खंबीर सतेज पाटील हळहळल्याचे काही जवळच्यांनी सांगितलं.
डॉ. डी. वाय. पाटील यांच्या जाण्याने संपूर्ण पाटील कुटुंबावर तसेच त्यांच्यावर प्रेम करणाऱ्या हजारो कार्यकर्ते आणि विद्यार्थ्यांवर दुःखाचा डोंगर कोसळला आहे. आयुष्यभर माणसं जोडत राहिलेल्या डॉ. डी. वाय. पाटील यांनी निःस्वार्थ भावनेने समाजसेवा केली. माणूस म्हणून कसे जगावे याचे संस्कार केले. त्यांचा प्रेमळ हात आणि मूल्यांची शिकवण हीच आमची खरी संपत्ती आहे अशी भावूक प्रतिक्रिया पाटील कुटुंबाने व्यक्त केली आहे.
कोल्हापूरमध्ये जन्मलेल्या डॉ. डी. वाय. पाटील यांनी महाराष्ट्रात तसेच देशभरात शिक्षण, आरोग्य आणि क्रीडा क्षेत्रात अथांग योगदान दिले. त्रिपुरा, बिहार आणि पश्चिम बंगाल या तीन राज्यांचे राज्यपाल म्हणून त्यांनी त्यांच्या कार्याचा ठसा उमटवला.
माजी राज्यपाल डॉ. डी. वाय. पाटील यांच्यावर बुधवार ५ ऑगस्ट २०२६ रोजी कोल्हापूर येथे अंत्यसंस्कार केले जाणार आहेत. पाटील कुटुंबाने दिलेल्या माहितीनुसार बुधवारी सकाळी ९ ते सायंकाळी ४ वाजेपर्यंत 'यशवंत निवास', कसबा बावडा, कोल्हापूर येथे डॉ. डी. वाय. पाटील यांचे अंत्यदर्शन घेता येईल. अंत्ययात्रा संध्याकाळी चार वाजता 'यशवंत निवास', कसबा बावडा येथून सुरू होणार आहे. नियोजनानुसार संध्याकाळी पाच वाजता डी. वाय. पाटील मेडिकल कॉलेज, लाईन बाजार, कसबा बावडा, कोल्हापूर येथे शासकीय इतमामात अंत्यसंस्कार होणार आहेत.