- उपमुख्यमंत्री एकनाथ शिंदे यांचे निर्देश; रोख रक्कम, सोने-चांदी आणि मौल्यवान वस्तूंच्या नोंदींची तपासणी होणार
मुंबई : प्रभादेवी येथील प्रसिद्ध श्री सिद्धिविनायक गणपती मंदिरातील देणग्यांमध्ये गैरव्यवहार झाल्याच्या आरोपांची उपमुख्यमंत्री एकनाथ शिंदे यांनी गंभीर दखल घेतली आहे. मंदिरात गेल्या पाच वर्षांच्या कालावधीत जमा झालेल्या सर्व प्रकारच्या देणग्यांचे तातडीने विशेष लेखापरीक्षण (स्पेशल ऑडिट) करण्याचे आदेश त्यांनी दिले आहेत. या लेखापरीक्षणात मंदिरात देणगी स्वरूपात आलेली रोख रक्कम, सोन्या-चांदीचे दागिने आणि इतर मौल्यवान वस्तूंच्या नोंदींची सखोल चौकशी केली जाणार असून, यात कोणतीही अनियमितता आढळल्यास संबंधितांवर कठोर कारवाई केली जाईल, असा इशाराही देण्यात आला आहे. (Audit Investigation)
श्री सिद्धिविनायक गणपती मंदिर न्यासाचे अध्यक्ष माजी आमदार सदा सरवणकर यांनी मंगळवारी उपमुख्यमंत्री एकनाथ शिंदे यांची भेट घेऊन मंदिरातील देणगी व्यवस्थापन आणि कथित आर्थिक गैरव्यवहाराच्या मुद्द्यांवर सविस्तर चर्चा केली. या बैठकीनंतर उपमुख्यमंत्र्यांनी तात्काळ विशेष ऑडिटचे निर्देश प्रशासनाला दिले. या आदेशानुसार, गेल्या पाच वर्षांत प्राप्त झालेल्या रोख रकमा, दागिन्यांचा साठा, जमा-खर्चाच्या नोंदी, हिशोबाची पुस्तके आणि आर्थिक व्यवहारांमधील पारदर्शकता यांची बारकाईने तपासणी केली जाणार आहे. (Siddhivinayak temple)
सिद्धिविनायक मंदिर हे देशातील सर्वाधिक देणग्या प्राप्त होणाऱ्या प्रमुख धार्मिक संस्थांपैकी एक आहे. त्यामुळे येथील प्रत्येक पैशाचा आणि दागिन्यांचा हिशोब पारदर्शक राहणे अत्यंत गरजेचे आहे. विशेष ऑडिटची ही संपूर्ण प्रक्रिया अत्यंत निष्पक्ष आणि पारदर्शक वातावरणात पार पाडण्याच्या सूचना देण्यात आल्या असून, लेखापरीक्षणाचा अहवाल प्राप्त झाल्यानंतर शासन यावर पुढील अंतिम निर्णय घेणार आहे. ( Siddhivinayak Donation Scam)
दोषींवर कारवाई होणार
दरम्यान, या विशेष लेखापरीक्षणादरम्यान निधीचा अपहार, देणगीच्या नोंदींमध्ये तफावत अथवा कोणताही गैरव्यवहार उघडकीस आल्यास जबाबदार घटकांवर कठोर कायदेशीर कारवाई केली जाईल, असे प्रशासकीय सूत्रांनी स्पष्ट केले आहे. या आदेशामुळे मंदिरातील कथित देणगी अपहार प्रकरणाच्या चौकशीला मोठी गती मिळाली असून, ऑडिट अहवालातून नेमकी कोणती माहिती समोर येते याकडे राज्यभरातील भाविकांचे लक्ष लागले आहे.