अर्ज आणि शुल्क भरण्यासाठी मिळाली नवी मुदत
महाराष्ट्र लोकसेवा आयोगाने (MPSC) महाराष्ट्र गट-क सेवा संयुक्त पूर्व परीक्षा-2026 साठी अर्ज सादर करणाऱ्या परीक्षार्थींना मोठा दिलासा दिला आहे. उमेदवारांकडून केली जाणारी मागणी आणि तांत्रिक बाबी विचारात घेऊन आयोगाने ऑनलाईन अर्ज आणि परीक्षा शुल्क भरण्यास मुदतवाढ जाहीर केली आहे. नव्या वेळापत्रकानुसार उमेदवारांना आता 10 ऑगस्ट 2026 रोजी रात्री 11.59 वाजेपर्यंत ऑनलाईन अर्ज सादर करता येणार आहेत. तसेच ऑनलाईन परीक्षा शुल्क भरण्यासाठी 13 ऑगस्ट 2026 रोजी रात्री 11.59 वाजेपर्यंतची अंतिम मुदत देण्यात आली आहे.
एकूण 5,707 पदांसाठी मेगाभरती; पदसंख्येत झाली वाढ
MPSC कडून राबवण्यात येत असलेल्या या भरती प्रक्रियेद्वारे विविध शासकीय विभागांमधील एकूण 5,707 पदांची भरती केली जात आहे. यापूर्वी आयोगाने प्रसिद्ध केलेल्या शुद्धीपत्रकानुसार वेगवेगळ्या विभागांच्या मागणीचा समावेश करून ही पदसंख्या वाढवण्यात आली आहे. सरकारी सेवेत रुजू होण्याचे स्वप्न पाहणाऱ्या हजारो तरुणांसाठी ही एक मोठी सुवर्णसंधी मानली जात आहे.
'My Account' मधून माहिती अपडेट करण्याचे आवाहन
ज्या उमेदवारांनी यापूर्वीच आपला अर्ज यशस्वीरीत्या सादर केला आहे, त्यांना पुन्हा नवीन अर्ज करण्याची कोणतीही आवश्यकता नाही, असे स्पष्टीकरण आयोगाने दिले आहे. मात्र, अशा उमेदवारांनी आयोगाच्या संकेतस्थळावर जाऊन 'My Account' या पर्यायातून आपली माहिती अद्ययावत (Update) करावी, असे निर्देश देण्यात आले आहेत.
कागदपत्र पडताळणीबाबत कडक नियम
अर्ज प्रक्रियेसोबतच आयोगाने पात्रतेबाबत कडक इशारा दिला आहे. उमेदवारांनी अर्जात दिलेल्या माहितीची आणि आवश्यक मूळ कागदपत्रांची पडताळणी प्रत्यक्ष नियुक्तीपूर्वी केली जाणार आहे. या पडताळणीदरम्यान कोणतीही माहिती चुकीची आढळल्यास किंवा पात्रता सिद्ध न झाल्यास संबंधित उमेदवाराला थेट नियुक्तीस अपात्र ठरवले जाईल. या भरतीसंदर्भातील सविस्तर शुद्धीपत्रक आणि सर्व अपडेट्स महाराष्ट्र लोकसेवा आयोगाच्या mpsc.gov.in या अधिकृत संकेतस्थळावर उपलब्ध करण्यात आले आहेत.