मुंबई : वन्यजीव तस्करीच्या मोठ्या प्रकरणाचा पर्दाफाश करत केंद्रीय अन्वेषण ब्युरो (CBI) आणि महसूल गुप्तचर संचालनालय (DRI) यांनी संयुक्त कारवाईत प्रतिबंधित प्रजातींच्या अवैध व्यापाराचे जाळे उघड केले आहे. या प्रकरणातील मुख्य सूत्रधार अर्जुन मंडल हा बांगलादेशातून संरक्षित वन्यजीव भारतात आणून त्यांची विविध राज्यांमध्ये विक्री करत असल्याचे तपासात समोर आले आहे.
गेल्या महिन्यात पश्चिम बंगालमधील उत्तर २४ परगणा जिल्ह्यातील माचलंदापूर परिसरात छापेमारीदरम्यान अधिकाऱ्यांनी वन्यजीव संरक्षण कायद्याच्या अनुसूची-१ अंतर्गत संरक्षित असलेले १५ स्लो लोरिस आणि ६ इजिप्शियन गिधाडे जप्त केली. या प्रजातींना भारतात सर्वोच्च कायदेशीर संरक्षण आहे. (Crime)
तपासादरम्यान एका ठिकाणी मोठ्या पिंजऱ्यात सहा इजिप्शियन गिधाडे आढळली. आरोपी सैकत बिस्वासने ही गिधाडे अर्जुन मंडलने आणून ठेवली असल्याची कबुली दिली. तसेच अर्जुन मंडलचा साथीदार हिमांशू मंडल उर्फ मिथुन हा या प्राण्यांची देखभाल करत असल्याचेही त्याने सांगितले. (Wildlife Trafficking)
यानंतर अधिकाऱ्यांनी हिमांशू मंडलच्या घरावर छापा टाकला असता, गच्चीवरील आठ पिंजऱ्यांमध्ये १० स्लो लोरिस ठेवलेले आढळले. चौकशीत हिमांशूने हे प्राणी अर्जुन मंडलने आणल्याचे आणि त्यांना ठेवण्यासाठी आर्थिक मोबदला मिळत असल्याची कबुली दिली.
तपासात उघड झालेल्या माहितीनुसार, आरोपी संरक्षित वन्यजीवांचा भारतातील विविध भागांमध्ये बेकायदेशीर व्यापार करत होते. या प्रकरणी CBI, मुंबईने अर्जुन मंडल, सैकत बिस्वास आणि हिमांशू मंडल या तिघांना अटक केली असून पुढील तपास सुरू आहे. (Bangladesh)