नवी दिल्ली : उत्तर प्रदेशातून (Uttar Pradesh) अनैतिक गैरप्रतिष्ठेतून जन्मदात्या बापानेच लेकीचा बळी घेतल्याची एक सुन्न करणारी घटना समोर आली आहे. आपल्या इच्छेविरुद्ध प्रेमविवाह केल्याचा तीव्र राग मनात धरून एका वडिलांनी आपल्या अवघ्या १८ वर्षांच्या गर्भवती मुलीची चंबळ नदीत बुडवून निर्घृण हत्या केली. अत्यंत क्रूरता दाखवत आरोपीने या हत्येचा व्हिडिओदेखील मोबाईलमध्ये रेकॉर्ड केल्याचा गंभीर आरोप आहे. हत्येनंतर स्वतःला वाचवण्यासाठी आरोपीने दिल्लीत जाऊन मुलगी बेपत्ता असल्याची खोटी तक्रार नोंदवली होती. मात्र, पोलिसांनी तांत्रिक तपासाच्या आधारे या प्रकरणाचा भंडाफोड करत आरोपी वडिलांना बेड्या ठोकल्या आहेत.
औषध आणण्याच्या बहाण्याने नेले चंबळ नदीकाठी
मिळालेल्या माहितीनुसार, आरोपी वडिलांचे नाव लखपत सिंग असे असून तो उत्तर प्रदेशातील बसौनी येथील नखनापुरी गावचा रहिवासी आहे. २९ जुलै रोजी सकाळी आरोपी लखपतने आपल्या गरोदर मुलीला औषध आणण्याचे सांगून बसौनी परिसरात नेले. तिथे पोहोचल्यानंतर त्याने मुलीला चंबळ नदीच्या पाण्यात ढकलून बुडवून मारले. हत्या केल्यानंतर आरोपी अत्यंत चालाखीने दक्षिण दिल्लीतील तिगरी पोलीस ठाण्यात पोहोचला आणि आपली मुलगी अचानक हरवल्याची तक्रार दाखल केली.
मोबाईल व्हिडिओमुळे फुटला बनाव
तपासादरम्यान दिल्ली पोलिसांना लखपत सिंग याच्या जबाबावर आणि वर्तनावर संशय आला. पोलिसांनी त्याची सखोल चौकशी केली आणि तांत्रिक तपास केला असता, त्याच्या मोबाईलमध्ये हत्येशी संबंधित व्हिडिओ रेकॉर्ड असल्याचा संशय बळावला. पोलिसांनी तातडीने लखपतला ताब्यात घेऊन अटक केली. घटनेचे गांभीर्य ओळखून पोलीस पथक आरोपीला सोबत घेऊन बसौनी पोलीस ठाण्याच्या हद्दीतील लखनपुरा गावात चंबळ नदीकाठी दाखल झाले. तरुणीचा मृतदेह शोधण्यासाठी पीएसीच्या (PAC) विशेष पाणबुड्यांना बोलावण्यात आले असून नदीत व्यापक शोध मोहीम राबवली जात आहे. पोलीस या प्रकरणाचा सर्व बाजूंनी अधिक तपास करत आहेत.