पुणे : पुणेकरांसाठी आजचा दिवस वाहतुकीच्या दृष्टीने महत्त्वाचा ठरणार आहे. आरक्षण उपवर्गीकरणाच्या विरोधात पुण्यात महामोर्चाचे आयोजन करण्यात आले असून, या पार्श्वभूमीवर शहरातील बंडगार्डन आणि आसपासच्या परिसरातील वाहतुकीत मोठे बदल करण्यात आले आहेत. त्यामुळे शनिवारी घराबाहेर पडण्यापूर्वी वाहतूक बदलांची माहिती घेणे पुणेकरांसाठी आवश्यक आहे. (Pune Traffic Alert)
हा महामोर्चा शाहीर अमर शेख चौक ते जिल्हाधिकारी कार्यालय या मार्गावर काढण्यात येणार आहे. मोर्चासाठी मोठ्या संख्येने नागरिक सहभागी होण्याची शक्यता असल्याने या परिसरात वाहतूक कोंडी होण्याची शक्यता आहे. ही परिस्थिती लक्षात घेऊन पुणे वाहतूक पोलिसांनी काही मार्गांवरील वाहतूक तात्पुरती बंद किंवा वळवण्याचा निर्णय घेतला आहे. (Pune Traffic Alert)
सकाळी ११ वाजल्यापासून वाहतूक बदल लागू :
वाहतूक पोलिसांनी दिलेल्या माहितीनुसार, शनिवारी सकाळी ११ वाजल्यापासून महामोर्चा संपेपर्यंत संबंधित वाहतूक बदल लागू राहणार आहेत. मोर्चाच्या मार्गावर वाहनांची गर्दी होऊ नये तसेच नागरिकांना सुरक्षितपणे प्रवास करता यावा, यासाठी वाहने पर्यायी मार्गांवर वळवण्यात येणार आहेत. विशेष म्हणजे, रुग्णवाहिका, अग्निशमन दल आणि इतर अत्यावश्यक सेवांच्या वाहनांना प्राधान्याने मार्ग उपलब्ध करून दिला जाणार आहे. (Pune Traffic Alert)
‘या’ भागात पार्किंगला पूर्ण बंदी :
मोर्चाच्या पार्श्वभूमीवर सुरक्षेच्या दृष्टीने काही महत्त्वाच्या रस्त्यांवर नो-पार्किंगचे आदेश देण्यात आले आहेत. त्यामुळे या भागात वाहने उभी करणाऱ्या वाहनचालकांवर कारवाई होण्याची शक्यता आहे. (Pune Traffic Alert)
नो-पार्किंग लागू असलेले प्रमुख भाग :
- मालधक्का चौक
- बोल्हाई चौक ते पुणे स्टेशन रस्ता
- साधू वासवाणी चौक
- जीपीओ चौक
- नरपतगिरी चौक
- फोटोझिंको प्रेस परिसर
- डॉ. बॅनर्जी चौक
त्यामुळे या भागात कामानिमित्त किंवा इतर कारणांसाठी जाणाऱ्या नागरिकांनी वाहन पार्क करण्यासाठी पर्यायी जागेचा वापर करावा, असे आवाहन करण्यात आले आहे. (Pune Traffic Alert)
कोणत्या मार्गावरील वाहतूक कुठे वळवली जाणार?
१. शाहीर अमर शेख चौक ➝ डॉ. बाबासाहेब आंबेडकर चौक (मालधक्का चौक)
या मार्गावरील वाहतूक आरटीओ चौक ते जहांगीर चौक मार्गे वळवण्यात येणार आहे.
२. आरटीओ चौक ➝ जहांगीर चौक / शाहीर अमर शेख चौक
या दिशेने जाणाऱ्या वाहनचालकांना कुंभारवेस मार्गाचा वापर करून इच्छितस्थळी जाण्याची सुविधा उपलब्ध करून देण्यात आली आहे.
३. जीपीओ चौक ➝ बोल्हाई चौक / मालधक्का चौक
या मार्गावरील वाहतूक किराड चौक आणि नेहरू मेमोरियल चौक मार्गे वळवण्यात येणार आहे.
४. पुणे स्टेशन चौक ➝ मालधक्का चौक
या दिशेने जाणाऱ्या वाहनचालकांनी अलंकार चौकाचा पर्यायी मार्ग वापरावा, असे वाहतूक पोलिसांनी सूचित केले आहे.
५. नरपतगिरी चौक ➝ मालधक्का चौक
या मार्गावरील वाहतूक १५ ऑगस्ट चौक ➝ कमला नेहरू हॉस्पिटल ➝ पवळे चौक ➝ कुंभारवेस चौक या मार्गाने वळवण्यात येणार आहे.
६. बॅनर्जी चौक ➝ शाहीर अमर शेख चौक
या दिशेने जाणारी वाहतूक नरपतगिरी चौक ➝ १५ ऑगस्ट चौक ➝ कमला नेहरू हॉस्पिटल ➝ पवळे चौक ➝ कुंभारवेस चौक या मार्गावरून डायव्हर्ट केली जाणार आहे.
पुणेकरांनी काय काळजी घ्यावी?
महामोर्चामुळे बंडगार्डन, पुणे स्टेशन, मालधक्का, जीपीओ चौक आणि आसपासच्या परिसरात वाहनांची मोठी गर्दी होण्याची शक्यता आहे. त्यामुळे शक्य असल्यास नागरिकांनी या भागात जाणे टाळावे किंवा प्रवासासाठी अतिरिक्त वेळ राखून ठेवावा. दुचाकी आणि चारचाकी वाहनचालकांनी वाहतूक पोलिसांनी दिलेल्या सूचनांचे पालन करावे. तसेच रस्त्याच्या कडेला अनधिकृतपणे वाहने पार्क करू नयेत. (Pune Traffic Alert)
महत्त्वाचे म्हणजे, वाहतूक बदल हे महामोर्चाची परिस्थिती आणि वाहतूक व्यवस्थेच्या गरजेनुसार बदलू शकतात. त्यामुळे प्रवास करण्यापूर्वी ताज्या वाहतूक सूचनांची माहिती घेणे पुणेकरांसाठी फायदेशीर ठरणार आहे.