पिंपरी-चिंचवड : पुणे शहरातील म्हेत्रे वस्तीत मोकाट कुत्र्यांच्या टोळीने 4 वर्षांच्या चिमुकलीवर हल्ला केल्याची धक्कादायक घटना रविवारी दुपारी घडली. या हल्ल्यात मुलगी गंभीर जखमी झाली असून, तिच्यावर रुग्णालयात उपचार सुरू आहेत. या घटनेचा थरारक प्रकार परिसरातील सीसीटीव्ही कॅमेऱ्यात (CCTV) कैद झाला आहे.
मिळालेल्या माहितीनुसार, मुलगी घराजवळील मोकळ्या जागेत खेळण्यासाठी गेली होती. त्यावेळी काही मोकाट कुत्र्यांनी अचानक तिचा पाठलाग सुरू केला. मुलीने कुत्र्यांपासून वाचण्यासाठी पळण्याचा प्रयत्न केला. मात्र, दोन कुत्र्यांनी तिच्यावर झडप घातली आणि तिला चावा घेतला. त्यानंतर आणखी पाच कुत्रे या टोळीत सहभागी झाले.
सीसीटीव्ही फुटेजमध्ये कुत्र्यांनी मुलीला चारही बाजूंनी घेरल्याचे दिसत आहे. हल्ल्यातून सुटण्यासाठी मुलगी प्रयत्न करत होती. तिचा आवाज ऐकून आणि हा प्रकार पाहून परिसरातील नागरिक मदतीसाठी धावून आले. नागरिकांनी कुत्र्यांना पिटाळून लावत मुलीची सुटका केली. (Pune News)
हल्ल्यात मुलीला गंभीर दुखापत झाली असून, तिला तातडीने वैद्यकीय उपचारांसाठी रुग्णालयात दाखल करण्यात आले. तिच्यावर सध्या उपचार सुरू आहेत.
या घटनेनंतर म्हेत्रे वस्ती आणि परिसरातील नागरिकांमध्ये भीतीचे वातावरण निर्माण झाले आहे. विशेषतः लहान मुलांच्या सुरक्षेचा प्रश्न पुन्हा ऐरणीवर आला आहे. परिसरात मोकाट कुत्र्यांची संख्या वाढल्याने अशा घटना वारंवार घडत असल्याचा आरोप रहिवाशांकडून केला जात आहे. (Dog Attack)
मोकाट कुत्र्यांचा बंदोबस्त करण्यासाठी आणि लहान मुलांसह नागरिकांच्या सुरक्षेसाठी महापालिका प्रशासनाने तातडीने ठोस उपाययोजना कराव्यात, अशी मागणी स्थानिक रहिवाशांनी केली आहे. भविष्यात अशा घटना टाळण्यासाठी संबंधित प्रशासनाने संवेदनशील भागांची पाहणी करून आवश्यक कारवाई करण्याची मागणीही जोर धरत आहे.