सांगली : सांगलीतील शिराळा तालुक्यातून आटूगडेवाडी येथे स्कूल व्हॅनचा भीषण अपघात होऊन पाच वर्षीय मुलीचा जागीच मृत्यू झाल्याची दुर्दैवी घटना सोमवारी सकाळी घडली. चालकाचा वाहनावरील ताबा सुटल्याने चारचाकी रस्त्यालगतच्या पुलाच्या कठड्यावर जोरदार आदळली. या अपघातात स्कूल व्हॅनमधील इतर काही मुले जखमी झाली असून त्यांच्यावर कोकरूड, शिराळा आणि कराड येथील विविध रुग्णालयांत उपचार सुरू आहेत. (Sangli School Van Accident)
शिराळा येथील सह्याद्री पब्लिक स्कूलची इंग्रजी माध्यमाची दुसरी शाखा वाघमारेवाडी येथे वर्षभरापूर्वी सुरू करण्यात आली आहे. या शाळेतील विद्यार्थ्यांची ने-आण करण्यासाठी शेडगेवाडी येथील युवराज कदम यांची चारचाकी वापरली जाते. सोमवारी सकाळी युवराज कदम गावातील विद्यार्थ्यांना घेऊन आटूगडेवाडी येथील एका विद्यार्थ्याला आणण्यासाठी गेले होते. (Accident)
विद्यार्थ्याला घेऊन परतत असताना आटूगडेवाडी येथे अचानक चालकाचा वाहनावरील ताबा सुटला. त्यानंतर चारचाकी रस्त्यालगत असलेल्या पुलाच्या कठड्यावर वेगाने जाऊन आदळली. या भीषण धडकेत चालकाच्या शेजारी बसलेली श्रीशा श्रीनाथ ऊर्फ गणेश इंगळे (वय ५, रा. मेणी) हिचा जागीच मृत्यू झाला. (sangli news)
अपघातात स्कूल व्हॅनमधील इतर विद्यार्थीही जखमी झाले. अपघाताची माहिती मिळताच परिसरातील नागरिकांनी घटनास्थळी धाव घेत जखमी विद्यार्थ्यांना तातडीने बाहेर काढले. त्यानंतर त्यांना कोकरूड, शिराळा आणि कराड येथील विविध रुग्णालयांत उपचारासाठी दाखल करण्यात आले.
या दुर्दैवी अपघातामुळे परिसरात हळहळ व्यक्त होत असून, शाळकरी विद्यार्थ्यांच्या सुरक्षित वाहतुकीचा प्रश्न पुन्हा एकदा ऐरणीवर आला आहे. (School Girls Death)