मुंबई : मुंबईत मुसळधार पावसाचा जोर कायम असतानाच कुर्ला परिसरातून मोठी आणि चिंताजनक घटना समोर आली आहे. घाटकोपर मधील चिराग नगर भागातील गौशिया चाळीजवळ बुधवारी (१२ ऑगस्ट) पहाटेच्या सुमारास अचानक दरड कोसळली. डोंगराचा मोठा भाग खचल्याने माती आणि दगडांचा ढिगारा चाळीतील घरांवर कोसळला. या ढिगाऱ्याखाली ४ ते ५ नागरिक अडकल्याची प्राथमिक भीती व्यक्त करण्यात येत आहे. तर दोघांचा मृत्यू झाल्याची प्राथमिक माहिती समोर आली आहे. (Ghatkopar Landslide)
बृहन्मुंबई महानगरपालिकेच्या (BMC) मुंबई अग्निशमन दलाकडून मिळालेल्या माहितीनुसार, ही घटना पहाटे सुमारे ३ वाजून ४८ मिनिटांनी घडली. कुर्ल्यातील रठोड मेडिकलजवळ असलेल्या गौशिया चाळीच्या मागील बाजूस डोंगराचा भाग अचानक खचला. त्यानंतर मोठ्या प्रमाणात माती आणि दगड खाली असलेल्या घरांवर येऊन पडले. (Ghatkopar Landslide)
अग्निशमन दलासह अनेक यंत्रणा घटनास्थळी :
घटनेची माहिती मिळताच मुंबई महापालिकेचा आपत्कालीन व्यवस्थापन कक्ष आणि अग्निशमन दलाच्या पथकांनी तातडीने घटनास्थळी धाव घेतली. स्थानिक पोलीस, महापालिकेच्या एल-वॉर्डचे कर्मचारी, १०८ रुग्णवाहिका तसेच संबंधित वीज वितरण कंपनीचे कर्मचारीही घटनास्थळी दाखल झाले आहेत. ढिगाऱ्याखाली अडकलेल्या नागरिकांचा शोध घेण्यासाठी बचावकार्य सुरू करण्यात आले आहे. पाऊस आणि अंधारामुळे सुरुवातीला बचावकार्यात अडथळे निर्माण झाले. मात्र, अग्निशमन दलाचे जवान आणि इतर बचाव पथके नागरिकांना सुरक्षितपणे बाहेर काढण्यासाठी शर्थीचे प्रयत्न करत आहेत. (Ghatkopar Landslide)
दरम्यान, मुंबईत गेल्या काही दिवसांपासून सुरू असलेल्या पावसामुळे डोंगराळ आणि दरडप्रवण भागातील नागरिकांच्या सुरक्षेचा प्रश्न पुन्हा ऐरणीवर आला आहे. प्रशासनाकडून परिस्थितीवर लक्ष ठेवण्यात येत असून बचावकार्य वेगाने सुरू आहे. (Ghatkopar Landslide)