मुंबई (विशेष प्रतिनिधी) : माहुल-चेंबूर येथील मैसूर कॉलनी मोनोरेल स्थानकाजवळ सुमारे ४० ते ५० फूट उंचीवर अचानक थांबलेल्या मोनोरेलमधील १८२ प्रवाशांची सुखरूप सुटका करणाऱ्या मुंबई अग्निशमन दलातील १३ अधिकारी आणि कर्मचाऱ्यांना राष्ट्रपती शौर्य पदकाने सन्मानित करण्यात येणार आहे. स्वातंत्र्यदिनाच्या निमित्ताने या पदकांची घोषणा करण्यात आली आहे. ही घटना ११ जून २०२४ रोजी सायंकाळी सुमारे ६.३८ वाजता घडली होती. मोनोरेल उंचावर अचानक बंद पडल्याने त्यामधील १८२ प्रवासी अडकले होते. घटनेची माहिती मिळताच मुंबई अग्निशमन दलाचे अधिकारी आणि जवान तातडीने घटनास्थळी दाखल झाले आणि बचावकार्य सुरू केले. उंचावर अडकलेल्या मोनोरेलमधील प्रवाशांना सुरक्षित बाहेर काढणे अग्निशमन दलासमोर मोठे आव्हान होते. सुमारे ४० ते ५० फुट उंचीवर अत्यंत सावधगिरीने जवानांनी बचावकार्य राबविले. अग्निशमन दलाच्या जवानांनी स्वतःच्या जीवाची पर्वा न करता अत्यंत कठीण परिस्थितीत काम केले. त्यांची तत्परता, धाडस, तांत्रिक कौशल्य आणि प्रसंगावधान यामुळे सर्व १८२ प्रवाशांची सुखरूप सुटका करण्यात यश आले.
या बचाव मोहिमेदरम्यान दाखविलेल्या असाधारण शौर्य, धाडस, कर्तव्यनिष्ठा आणि कार्यकुशलतेची दखल घेत १३ अधिकारी आणि कर्मचाऱ्यांची राष्ट्रपती शौर्य पदकासाठी निवड करण्यात आली आहे. या अग्निशमन जवानांच्या धाडसी कामगिरीमुळे संभाव्य मोठी दुर्घटना टळली आणि १८२ प्रवाशांचे प्राण वाचले. राष्ट्रपती शौर्य पदकासाठी झालेली त्यांची निवड ही मुंबई अग्निशमन दलाच्या शौर्य, समर्पण आणि कर्तव्यनिष्ठेचा राष्ट्रीय स्तरावरील गौरव मानला जाते.
या १३ अग्निशमन अधिकारी-कर्मचाऱ्यांचा होणार सन्मान
आर. एन. अंबुलगेकर — (प्रमुख अग्निशमन अधिकारी), विक्रोळी अग्निशमन केंद्र
ए. व्ही. परब — (उपप्रमुख अग्निशमन अधिकारी) दादर अग्निशमन केंद्र
एम. के. सावंत — (विभागीय अग्निशमन अधिकारी), दादर अग्निशमन केंद्र
आर. के. कांबळे — (वरिष्ठ केंद्र अधिकारी) फोर्ट अग्निशमन केंद्र
वाय. एच. पवार — (केंद्र अधिकारी, चेंबूर) अग्निशमन केंद्र
डी. ए. भोसले — (केंद्र अधिकारी) वडाळा अग्निशमन केंद्र
राजेश विष्णू राणे — (यंत्रचालक)चेंबूर अग्निशमन केंद्र
महेश आनंद गुडलककर — (यंत्रचालक) फोर्ट अग्निशमन केंद्र
रमेश जीवन कोटी — (अग्निशामक) वडाळा अग्निशमन केंद्र
हर्षल शंकर कटके — (अग्निशामक) वडाळा अग्निशमन केंद्र
चिंतामणी शिवाजी खांडकर — (अग्निशामक), फोर्ट अग्निशमन केंद्र
विकी नागेश सरवदे — (अग्निशामक) फोर्ट अग्निशमन केंद्र
सुदर्शन घनश्याम पावडे — (अग्निशामक), चेंबूर अग्निशमन केंद्र