मुंबई : राष्ट्रवादी काँग्रेसचे आमदार झीशान सिद्दीकी (Zeeshan Siddique) यांना पोर्तुगालमधील एका क्रमांकावरून व्हॉइस नोट पाठवत जीवे मारण्याची धमकी देण्यात आली आहे. दोन दिवसांपूर्वी परदेशात असताना त्यांच्या मोबाईलवर ही धमकीची व्हॉइस नोट आली. यानंतर शुक्रवारी झीशान सिद्दीकी यांनी वांद्रे पोलीस ठाण्यात धाव घेत नॉन-कॉग्निझेबल (NC) तक्रार दाखल केली.
‘गँगशी संबंध असल्याचा’ दावा :
धमकी देणाऱ्या व्यक्तीने आपले नाव झीशान अख्तर असल्याचे सांगितले असून, आपण एका गँगशी संबंधित असल्याचा दावा केल्याचे पोलिसांनी सांगितले. तसेच झीशान सिद्दीकी (Zeeshan Siddique) यांचे वडील बाबा सिद्दीकी यांच्या हत्येपूर्वी दोन वर्षे आधी त्यांना मारण्यासाठी आपल्या गँगमधील एका साथीदाराला सांगितल्याचा दावा या व्यक्तीने केला आहे. बाबा सिद्दीकी हत्या प्रकरणात लॉरेन्स बिश्नोई गँगच्या सदस्यांवर आरोप आहेत. झीशान अख्तर हे या प्रकरणातील आरोपी असून ते फरार आहेत. धमकी देणाऱ्या व्यक्तीने हा प्रकार पैशांसाठी नसल्याचे सांगत झीशान सिद्दीकी यांच्या कथित ‘बेकायदेशीर व्यवसायावर’ आक्षेप असल्याचे म्हटले आहे.
‘वडिलांसारखेच तुम्हालाही मारू’ अशी धमकी :
तक्रार दाखल केल्यानंतर माध्यमांशी बोलताना झीशान सिद्दीकी (Zeeshan Siddique) म्हणाले की, परदेशात असताना त्यांना ही व्हॉइस नोट मिळाली. “मला माझ्या वडिलांप्रमाणे मारले जाईल,” असा धमकीचा संदेश त्यात असल्याचे त्यांनी सांगितले. यापूर्वीही सोशल मीडियाच्या माध्यमातून आपल्याला धमक्या मिळाल्याचा दावा त्यांनी केला. बाबा सिद्दीकी यांच्या हत्येपूर्वीही आपल्या कुटुंबाला धमक्यांबाबत चिंता होती, असे सांगत सिद्दीकी यांनी सुरक्षेचा मुद्दा उपस्थित केला. त्यांच्या म्हणण्यानुसार, सध्या त्यांची पोलीस सुरक्षा काढून घेण्यात आली आहे. यासंदर्भात त्यांनी मुंबई पोलीस आयुक्त देवेन भारती यांच्याशी चर्चा केली असल्याचेही सांगितले.
‘माझे काही झाले तर पोलिसांनी जबाबदारी घ्यावी’ :
“मी घाबरत नाही, मात्र पोलिसांना माहिती देणे माझे कर्तव्य आहे. आता माझी सुरक्षा वाढवायची की नाही, हा निर्णय पोलिसांनी घ्यायचा आहे. उद्या माझ्यावर गोळीबार झाला, तर माझ्या वडिलांच्या हत्येला जबाबदार असलेलेच त्यासाठी जबाबदार असतील,” असे झीशान सिद्दीकी (Zeeshan Siddique) यांनी म्हटले. ही धमकीची व्हॉइस नोट त्यांनी मुख्यमंत्री देवेंद्र फडणवीस आणि मुंबई पोलीस आयुक्तांकडे पाठवली असल्याचेही त्यांनी सांगितले. परदेशात जाण्यापूर्वी त्यांनी मुख्यमंत्र्यांची भेट घेऊन सुरक्षा हटवल्याबाबत चिंता व्यक्त केली होती.
दरम्यान, गेल्या आठवड्यात झीशान सिद्दीकी (Zeeshan Siddique) यांच्या रिट याचिकेशी संबंधित सुनावणीदरम्यानही त्यांना सोशल मीडियावरून जीवे मारण्याची धमकी मिळाली होती. त्यानंतर त्यांची बहीण अर्शिया सिद्दीकी यांनी वांद्रे पोलीस ठाण्यात NC दाखल केली होती.
झीशान सिद्दीकी (Zeeshan Siddique) यांच्या म्हणण्यानुसार, यापूर्वी त्यांच्या सुरक्षेसाठी आठ पोलीस कर्मचारी तैनात होते, तर त्यांच्या निवासस्थानी २२ पोलीस कर्मचारी सुरक्षेसाठी नियुक्त होते. मात्र, त्यांच्या आईने न्यायालयात धाव घेतल्यानंतर त्यांच्यासोबत असलेल्या आठपैकी सात पोलीस कर्मचाऱ्यांची सुरक्षा काढण्यात आली. बाबा सिद्दीकी हत्या प्रकरणाच्या तपासाबाबत आपले कुटुंब समाधानी नसल्याचेही त्यांनी सांगितले.