मुंबई : मॉडेल आणि वेब सिरीज अभिनेत्री अंतरा बॅनर्जी (३१) हिला १२ ऑगस्ट रोजी अरवली एक्सप्रेसमध्ये जागेचे आरक्षण नसल्यामुळे झालेल्या वादानंतर रेल्वे सुरक्षा दलाच्या (आरपीएफ) जवानांवर रेझर ब्लेडने हल्ला केल्याच्या आरोपाखाली अटक करण्यात आली आहे. एका शूटिंगसाठी सुरतला जात असताना, केवळ स्लीपर-क्लासचे तिकीट असूनही अंतरा कथितरित्या आरक्षित एसी डब्यात घुसली होती. (Antara Banerjee)
नेमकं प्रकरण काय ?
ही घटना बोरिवली व डहाणू दरम्यान रात्री सुमारे ९.३० ते १०.५० च्या दरम्यान घडली. एफआयआरनुसार, एका प्रवाशाने अंतरा बॅनर्जीला आरक्षित जागा खाली करण्यास सांगितले. तिने नकार दिल्यानंतर, त्या प्रवाशाने तिकीट कलेक्टर हरिकेश त्रिपाठी आणि आरपीएफला याची माहिती दिली. आरपीएफचे सहायक उपनिरीक्षक यामिनीकांत मिश्रा यांनी सांगितले की, त्यांनी आणि कॉन्स्टेबल राजेश कुमार यांनी हस्तक्षेप केला, परंतु अंतरा बॅनर्जीने अधिकाऱ्यांना शिवीगाळ केली आणि हिंसक झाली. पोलिसांनी सांगितले की, त्यानंतर तिने ब्लेड उगारले आणि मिश्रा तसेच स्वतःला जखमी केले. मिश्रा यांनी आरोप केला की, अंतराने त्यांचा गणवेश आणि मोबाईल फोनचेही नुकसान केले. आणखी वाद टाळण्यासाठी आरपीएफच्या जवानांनी एसी डब्याचे दरवाजे बंद केले. डहाणू रेल्वे स्थानकावर उतरवून जीआरपीच्या ताब्यात देण्यापूर्वी, अंतराने पळून जाण्यासाठी काच फोडण्याचा प्रयत्न केल्याचा आरोप आहे. हा सगळा प्रकार तासभर चालला ज्यामुळे प्रवासीही हादरले. (Antara Banerjee)
पोलिसांनी ताब्यात घेतले पण...
दुसऱ्या दिवशी सकाळी बोरीवली रेल्वे पोलिसांनी अंतराला ताब्यात घेतले. बोरीवली जीआरपीचे निरीक्षक कुंडा गवाडे म्हणाले की, एसी कोचचे तिकीट न मिळाल्याने अंतरा अस्वस्थ झाली असेल, असे प्रत्यक्षदर्शींनी सांगितले. नातेवाईक किंवा कायदेशीर सल्लागाराशी संपर्क साधण्यास सांगितले असता, तिने नकार दिला आणि अटक करण्याची मागणी केली. “एफआयआर दाखल झाल्यानंतर मात्र ती शांत झाली,” असे गवाडे यांनी सांगितले. १३ ऑगस्टच्या एफआयआरमध्ये अंतराला आरोपी म्हणून घोषित करण्यात आले होते. पोलिसांनी तिच्यावर सुरक्षेला धोका निर्माण करणे, सरकारी कर्मचाऱ्यांना गंभीर दुखापत करणे, हल्ला करणे आणि हेतुपूर्वक अपमान करणे या आरोपांखाली गुन्हा दाखल केला. तिला नोटीस बजावण्यात आली आणि नंतर जामिनावर सुटका करण्यात आली. (Antara Banerjee)