Weather Alert India : देशातील 12 राज्यांना मुसळधार पावसाचा इशारा; नेमका कुठे आणि कसा पाऊस पडणार? जाणून घ्या

नवी दिल्ली : बंगालच्या उपसागरात निर्माण झालेल्या हवामान प्रणालीमुळे देशातील अनेक भागांत मान्सून सक्रिय झाला असून, पुढील काही दिवसांत मुसळधार पावसाची शक्यता आहे. भारतीय हवामान विभागाने (IMD) रविवारी उत्तर प्रदेश, बिहार, दिल्ली-एनसीआर, राजस्थान, हरियाणा, उत्तराखंड, हिमाचल प्रदेश, जम्मू-काश्मीर, मध्य प्रदेश, छत्तीसगड, पश्चिम बंगाल, ओडिशा आणि झारखंडमधील विविध भागांसाठी पावसाचा अंदाज व्यक्त केला आहे. (Weather Alert India) उत्तर प्रदेशात संततधार पावसामुळे गंगा नदीच्या पाणीपातळीत वाढ झाली असून, वाराणसीतील अनेक छोटी मंदिरे पाण्याखाली गेली आहेत. राज्यातील बहुतांश जिल्ह्यांत रविवारी पावसाची शक्यता आहे. त्यामुळे नदीकाठच्या आणि सखल भागातील नागरिकांना सतर्क राहण्याचे आवाहन करण्यात आले आहे. दिल्ली-एनसीआरमध्येही रविवारी पावसाची शक्यता असून, त्यामुळे गेल्या काही दिवसांपासून जाणवत असलेल्या दमट उष्णतेपासून नागरिकांना काहीसा दिलासा मिळण्याची शक्यता आहे. मात्र, पावसानंतर पुन्हा आर्द्रता वाढू शकते. (Weather)

डोंगराळ राज्यांमध्ये भूस्खलनाचा धोका

उत्तराखंड, हिमाचल प्रदेश आणि जम्मू-काश्मीरमध्येही मान्सून सक्रिय आहे. उत्तराखंडमधील काही भागांत पावसामुळे भूस्खलनाच्या घटना घडल्या असून, काही मार्गांवरील वाहतुकीवर परिणाम झाला आहे. डेहराडून, नैनिताल, चमोली, पिथोरगड, रुद्रप्रयाग यांसह विविध जिल्ह्यांत पावसाची शक्यता आहे. हिमाचल प्रदेशातील कुल्लू, मनाली, कांग्रा, सोलन आदी भागांतही पावसाचा अंदाज आहे.

बिहार, मध्य प्रदेश आणि छत्तीसगडमध्येही पाऊस

बिहारमध्ये पाटणा, पश्चिम चंपारण, गया, भागलपूर, पूर्णिया, किशनगंज, कटिहार यांसह अनेक जिल्ह्यांत पावसाची शक्यता आहे. मध्य प्रदेशात कमी दाबाचे क्षेत्र आणि मान्सूनच्या स्थितीमुळे भोपाळ, जबलपूर, रीवा आणि शहडोल विभागात पावसाचा जोर कायम राहण्याची शक्यता आहे. छत्तीसगडमध्येही रायपूर, बिलासपूर आणि सुरगुजा विभागांत पाऊस अपेक्षित आहे. (Monsoon) हवामान विभागाच्या अंदाजानुसार, पश्चिम बंगाल, उत्तर ओडिशा आणि झारखंडमधील गंगा मैदानी भागात पुढील काही दिवस मुसळधार ते अति मुसळधार पाऊस पडण्याची शक्यता आहे. 17 ऑगस्ट रोजी काही ठिकाणी अतिवृष्टीची शक्यताही वर्तवण्यात आली आहे. पश्चिम हिमालयीन प्रदेश आणि उत्तर प्रदेशातही पुढील काही दिवस पावसाचा जोर कायम राहण्याची शक्यता असल्याने नागरिकांनी हवामान विभागाच्या सूचनांचे पालन करावे आणि डोंगराळ भागात अनावश्यक प्रवास टाळावा. (IMD)