मुंबई : भारत आणि श्रीलंका यांच्यातील दोन सामन्यांच्या कसोटी मालिकेतील पहिला सामना गॉल इंटरनॅशनल क्रिकेट स्टेडियमवर सुरू आहे. मात्र, सामन्याच्या पहिल्या दोन दिवसांपासून पावसाने वारंवार व्यत्यय आणल्याने टीम इंडियाच्या अडचणी वाढण्याची शक्यता आहे. विशेष म्हणजे, हा सामना अनिर्णित राहिल्यास त्याचा थेट परिणाम भारताच्या वर्ल्ड टेस्ट चॅम्पियनशिप (WTC) २०२५-२७ मधील फायनलच्या शर्यतीवर होऊ शकतो. (Ind vs SL Test Match)
पहिल्या दिवशी भारताचा दबदबा :
भारताचा कर्णधार शुभमन गिलने नाणेफेक जिंकून प्रथम फलंदाजीचा निर्णय घेतला. सुरुवातीला काही विकेट गमावल्यानंतर देवदत्त पडिक्कल आणि केएल राहुल यांनी डाव सावरला. पडिक्कलने शानदार शतक झळकावत श्रीलंकेच्या गोलंदाजांवर दबाव निर्माण केला. केएल राहुलनेही ७७ धावांची महत्त्वपूर्ण खेळी केली. मात्र, क्रॅम्प्सचा त्रास झाल्याने त्याला रिटायर्ड हर्ट व्हावे लागले. (Ind vs SL Test Match)
भारत मजबूत स्थितीत असतानाच पावसाने दोनदा सामन्यात व्यत्यय आणला. त्यामुळे पहिल्या दिवशी केवळ ७३ षटकांचा खेळ होऊ शकला.
दुसऱ्या दिवशीही पावसाचा अडथळा :
दुसऱ्या दिवसाचा खेळ सकाळी ९.४५ वाजता सुरू होणार होता. मात्र, गॉलमध्ये सकाळपासूनच जोरदार पाऊस सुरू झाला. दुपारी सुमारे १२.२० वाजेपर्यंत पाऊस सुरू राहिल्याने मैदानावर वेळेत सामना सुरू होऊ शकला नाही. यामुळे भारताला पहिल्या डावातील आपली मजबूत स्थिती आणखी भक्कम करण्याची संधी मिळत नाही. पुढील काही दिवसही गॉलमध्ये पावसाची शक्यता असल्याने सामन्यातील मोठ्या प्रमाणावर खेळ वाया जाण्याची भीती व्यक्त केली जात आहे. (Ind vs SL Test Match)
ड्रॉ झाल्यास भारताला किती नुकसान?
भारत सध्या WTC 2025-27 चक्रात ९ कसोटी सामने खेळला आहे. त्यापैकी ४ सामने भारताने जिंकले, ४ गमावले, तर १ सामना अनिर्णित राहिला आहे. भारताच्या खात्यात ५२ गुण असून पॉइंट्स पर्सेंटेजच्या आधारावर टीम इंडिया सध्या पाचव्या स्थानावर आहे. गॉल कसोटी अनिर्णित राहिल्यास भारत आणि श्रीलंकेला प्रत्येकी ४ गुण मिळतील. त्यामुळे भारताच्या पॉइंट्स पर्सेंटेजमध्ये घट होऊन ते सुमारे ५१.८५ टक्क्यांवर येऊ शकते. परिणामी, WTC गुणतालिकेतील भारताच्या स्थानावर दबाव वाढेल. (Ind vs SL Test Match)
फायनलचा मार्ग होणार कठीण?
गॉल कसोटी ड्रॉ झाल्यास भारताच्या WTC फायनलच्या शर्यतीतील आव्हान निश्चितच कठीण होईल. या सामन्यानंतर भारताचे आणखी ८ कसोटी सामने शिल्लक राहणार आहेत. त्यापैकी दोन सामन्यांत पराभव झाल्यास भारतासाठी अंतिम फेरी गाठण्याचे समीकरण आणखी गुंतागुंतीचे होऊ शकते. विशेष म्हणजे, भारताला उर्वरित सामन्यांपैकी तब्बल पाच कसोटी सामने ऑस्ट्रेलियाविरुद्ध खेळायचे आहेत. त्यामुळे गॉलमध्ये पावसामुळे एक सामना ड्रॉ होणे भारतासाठी केवळ एका सामन्याचे नुकसान ठरणार नाही, तर संपूर्ण WTC मोहिमेवर त्याचा परिणाम होऊ शकतो. (Ind vs SL Test Match)
मात्र, फक्त हा सामना ड्रॉ झाल्याने भारत WTCच्या शर्यतीतून थेट बाहेर पडणार नाही. उर्वरित सामन्यांतील निकाल, इतर संघांचे गुण आणि पॉइंट्स पर्सेंटेज यावर अंतिम समीकरण अवलंबून असेल. (Ind vs SL Test Match)