Ashok Kharat : दैवी शक्ती, मंत्र-तंत्र आणि भविष्याची भीती दाखवून महिलांवर लैंगिक अत्याचार केल्याचा आरोप असलेल्या स्वयंघोषित भोंदू अशोक खरात उर्फ ‘कॅप्टन’ याच्याविरुद्धच्या प्रकरणातील कायदेशीर कारवाई आता निर्णायक टप्प्यावर पोहोचली आहे. नाशिक जिल्हा सत्र न्यायालयात दाखल लैंगिक अत्याचाराच्या गुन्ह्यात सोमवारी पाचवी सुनावणी पार पडली. नाशिकरोड मध्यवर्ती कारागृहात (Nashik Road Central Jail) असलेल्या खरातला व्हिडिओ कॉन्फरन्सिंगद्वारे (Video Conferencing) न्यायालयासमोर हजर करण्यात आले. सध्या न्यायालयात दोषारोपपत्राच्या पडताळणीची प्रक्रिया सुरू असून, या प्रकरणाची पुढील सुनावणी ३१ ऑगस्ट रोजी होणार आहे.
खरातविरोधात १८ गंभीर गुन्हे दाखल
संशयित खरातविरोधात नाशिकसह विविध भागात एकूण १८ गंभीर गुन्हे दाखल आहेत. यापैकी आठ गुन्हे महिलांवरील अत्याचाराशी संबंधित असून, इतर गुन्ह्यांमध्ये फसवणूक, जादूटोणा विरोधी कायदा आणि बेकायदेशीर सावकारीशी संबंधित प्रकरणांचा समावेश आहे. प्रकरणाचे गांभीर्य लक्षात घेता राज्याच्या पोलीस महासंचालकांच्या आदेशानुसार २० मार्चपासून विशेष तपास पथकाची स्थापना करण्यात आली आहे. एसआयटीकडून तपासाला गती देण्यात आली असून, नाशिक सत्र न्यायालयात दोषारोपपत्र दाखल करण्यात आले आहे.
सरकारवाडा पोलीस ठाण्यात नोंदवलेल्या पहिल्या गुन्ह्यात तब्बल १०५ साक्षीदारांचे जबाब नोंदवण्यात आले आहेत. त्यामुळे या प्रकरणातील तपासाची व्याप्ती आणि खरातविरोधातील कायदेशीर कारवाईचे गांभीर्य स्पष्ट होत आहे. पुढील सुनावणीकडे आता लक्ष लागले आहे.