मुंबई : मुंबईतील कुलाबा येथील नेव्ही नगरमधील सामूहिक मृत्यू प्रकरणाच्या तपासात नवनवीन माहिती समोर येत आहे. या घटनेचा तपास पुढे जात असताना फॉरेन्सिक आणि वैद्यकीय तपासातून काही महत्त्वाचे निष्कर्ष समोर आले आहेत. या प्रकरणात नौदल अधिकारी पूरणमल मेहरा, त्यांची पत्नी ओमा आणि दोन मुलांचा मृत्यू झाला होता. मुंबईतील या घटनेमुळे शहरात एकच खळबळ उडाली होती. (Mumbai News)
धक्कादायक खुलासे
तपासातील प्राथमिक माहितीनुसार, पूरणमल यांनी पत्नी ओमा आणि धाकटा मुलगा दर्श यांचा गुदमरवून जीव घेतल्याचा संशय आहे. त्यानंतर मोठा मुलगा यश याला विष देण्यात आल्याचे तपासात समोर आले आहे. या तिघांच्या मृत्यूनंतर पूरणमल यांनी स्वतः गळफास घेऊन आत्महत्या केल्याचे प्राथमिक तपासातून स्पष्ट होत असल्याचे सांगण्यात येत आहे. (Navy Suicide)
वडिलांना तो मेसेज पाठवला अन्
15 ऑगस्ट रोजी घटना उघडकीस येण्यापूर्वी पूरणमल यांनी मध्यरात्री आपल्या वडिलांना व्हॉट्सॲपवर संदेश पाठवल्याची माहिती समोर आली आहे. या संदेशात मृतदेह घेण्यासाठी येण्याचा उल्लेख असल्याचे सांगितले जात आहे. या मेसेजमुळे तपासाला महत्त्वाचा धागा मिळाला आहे.
पत्नीच्या मोबाईलमधील डेटा
दरम्यान, पूरणमल आणि त्यांच्या पत्नीच्या मोबाईलमधील डेटा हटवण्यात आल्याचे तपासात आढळले आहे. त्यामुळे मोबाईलमधील डिलीट झालेली माहिती आणि इतर डेटा परत मिळवण्यासाठी सायबर पथक प्रयत्न करत आहे. मोबाईलमधील माहिती या घटनेच्या कारणांवर प्रकाश टाकू शकते, अशी शक्यता तपास यंत्रणांकडून व्यक्त केली जात आहे.
पूरणमल गेल्या वर्षभरापासून वैद्यकीय रजेवर होते आणि INHS अस्विनी येथे नैराश्यासाठी उपचार घेत असल्याची माहितीही समोर आली आहे. यापूर्वी त्यांनी आत्महत्येचे विचार व्यक्त केल्याचेही सांगण्यात येत आहे. आर्थिक अडचणी, कुटुंबीयांपासून असलेले अंतर आणि कौटुंबिक तणावामुळे त्यांची मानसिक स्थिती बिघडली असल्याची प्राथमिक माहिती आहे.
या घटनेच्या सुमारे 10 दिवस आधी पती-पत्नीमध्ये जोरदार वाद झाला होता. त्यावेळी पूरणमल यांनी पत्नीचा मोबाईल फोडल्याचेही तपासात समोर आल्याचे सांगितले जात आहे. या सर्व बाबींचा तपास यंत्रणा सखोलपणे तपासत असून या सामूहिक मृत्यूमागील नेमकी कारणे शोधण्याचे काम सुरू आहे. (Mumbai Crime)