Nashik Crime News : फिटनेस सेंटरच्या नावाखाली देहविक्रीचा व्यवसाय सुरु असल्याचा धक्कादायक प्रकार नाशिकमध्ये उघडकीस आला आहे. नाशिकच्या मुंबई नाक्याजवळील श्रीहरी कुटे मार्गावर एका बंगल्यामध्ये फिटनेस सेंटरच्या (Fitness Center) नावाखाली महिलांकडून देहविक्रीचा व्यवसाय करून घेतले जात असल्याची गोपनीय माहिती पोलिसांना मिळाली होती त्यानंतर पोलिसांनी कारवाई करत देहविक्रीच्या या व्यवसायाचा अड्डा उद्ध्वस्त केला आहे. मध्यवर्ती गुन्हे शाखेच्या पथकाने छापा टाकून ही कारवाई केली असून पोलिसांनी एका पिडीत महिलेची सुटका केली आहे तर दोघा संशयितांविरूद्ध अनैतिक व्यापार प्रतिबंध अधिनियम १५६ कलम ३, ४, ५ अन्वये मुंबई नाका पोलीस ठाण्यात गुन्हा दाखल (Mumbai Naka Police Station) करण्यात आला आहे.
मुंबई नाका पोलीस ठाण्यात गुन्हा दाखल
मध्यवर्ती गुन्हे शाखेचे वरिष्ठ पोलीस निरीक्षक योगेश देशमुख यांच्या नेतृत्वाखाली श्रीहरी कुटे मार्गावरील शिवम नावाच्या बंगल्यात छापा टाकून ही कारवाई करण्यात आली. याप्रकरणी संजय विजय शर्मा, (रा.अशोकामार्ग, नाशिक) आणि कृष्णाकुमार सिताराम यादव (वय २६, रा. श्रीहरी कुटे मार्ग, नाशिक. मुळ गाव अथरा ता. जि.हजारीबाग, झारखंड) यांच्याविरूद्ध मुंबई नाका पोलीस ठाण्यात (Mumbai Naka Police Station) गुन्हा दाखल करण्यात आला. तर देहविक्रीच्या या व्यवसायाचा अड्डा उद्ध्वस्त करत पोलिसांनी एका पीडित महिलेची यातून सुटका केली आहे.
उपनिरीक्षक विश्वास चव्हाणके, महिला पोलीस उपनिरीक्षक सुवर्णा महाजन, सहाय्यक पोलीस निरीक्षक शेरखान पठाण, हवालदार गणेश वाघ, प्रजित ठाकूर, युवराज कानमहाले, अंमलदार योगेश परदेशी, अतुल पाटील, महिला हवालदार लिला सुकटे, महिला अंमलदार वैशाली घरटे, चालक हवालदार दीपक पाटील आणि विपला या एनजीओ संस्थेचे तुषार सुर्यवंशी, प्रियदर्शनी पवार यांच्या पथकाने ही कामगिरी यशस्वी केली.
नाशिक जिल्ह्यात पुन्हा भूकंपाचे धक्के
दरम्यान, नाशिक जिल्ह्यात मागील काही दिवसांपासून सातत्याने भूकंपाचे धक्के जाणवत आहे. दरम्यान बुधवारी सकाळीही ९ वाजता पेठ (Peth) तालुक्यात भूकंपाचे सौम्य धक्के जाणवले, त्यामुळे नागरिकांमध्ये भीतीचे वातावरण आहे. पेठ (Peth) तालुक्यातील गोंदे, करंजाळी, भायगाव, देवगाव, आडगाव भुवन, एकदरे परिसर हा या धक्क्यांनी हादरला. या घटनेत कोणतीही जीवितहानी झालेली नाही मात्र काही घरांच्या भिंतींना तडे गेल्याने काही ठिकाणी घरांचे नुकसान झाले आहे.ग्रामीण आणि आदिवासी भागात वारंवार होणाऱ्या या भूकंपांमुळे प्रशासनाने तत्काळ याची दखल घेऊन उपाययोजना कराव्यात, अशी मागणी स्थानिकांकडून केली जात आहे.