मुंबई : मुंबईतील अंधेरी परिसरातील प्रसिद्ध जिमिज बर्गर या हॉटेलमध्ये खाद्यपदार्थाच्या सुरक्षिततेबाबत गंभीर प्रकार समोर आला आहे. हॉटेलमध्ये मागवलेल्या कोरियन व्हेजी बर्गरमध्ये (Veg Burger) काचेचा तुकडा आढळल्याची तक्रार करण्यात आली आहे. या घटनेनंतर ग्राहकांच्या सुरक्षिततेचा मुद्दा पुन्हा चर्चेत आला असून, याप्रकरणी अन्न व औषध प्रशासनाकडे (FDA) तसेच आंबोली पोलीस ठाण्यात तक्रार दाखल करण्यात आली आहे.
मिळालेल्या माहितीनुसार, तनिषा गोगरी ही तरुणी 16 ऑगस्ट रोजी आपल्या मैत्रिणीसोबत अंधेरीतील जिमिज बर्गर येथे गेली होती. दोघींनी काही खाद्यपदार्थांची ऑर्डर दिली. यामध्ये नाचो बन आणि कोरियन व्हेजी बर्गरचा समावेश होता. बर्गर खात असताना तनिषाला त्यामध्ये अचानक काचेचा तुकडा असल्याचे लक्षात आले. (Mumbai News)
काचेचा तुकडा लक्षात येताच तरुणीने तातडीने हा प्रकार आपल्या मैत्रिणीला आणि हॉटेलमधील कर्मचाऱ्यांना सांगितला. सुदैवाने काचेचा तुकडा घशात अडकला नाही किंवा त्यामुळे कोणतीही मोठी दुखापत झाली नाही. मात्र, तो तुकडा चुकून गिळला गेला असता किंवा तोंडाला लागला असता गंभीर इजा होण्याची शक्यता होती. (FDA)
घटनेनंतर तरुणी आणि तिच्या मैत्रिणीने हॉटेल व्यवस्थापनाला याबाबत माहिती दिली. मात्र, तक्रारीनुसार हॉटेल कर्मचाऱ्यांनी बर्गरमधील काचेचा तुकडा जतन करण्याऐवजी तो फेकून दिला. या प्रकारामुळे ग्राहकाच्या कुटुंबीयांनी नाराजी व्यक्त केली.
यानंतर तनिषाच्या वडिलांनी याप्रकरणी अन्न व औषध प्रशासन आणि आंबोली पोलिसांकडे तक्रार दाखल केली. खाद्यपदार्थात काचेचा तुकडा कसा आला, तसेच तक्रार केल्यानंतर हॉटेल व्यवस्थापनाने पुरावा का जतन केला नाही, याबाबत आता संबंधित यंत्रणांकडून तपास केला जाण्याची शक्यता आहे. (Food Safety)
प्रसिद्ध हॉटेलमध्ये घडलेल्या या प्रकारामुळे खाद्यपदार्थ तयार करताना स्वच्छता आणि सुरक्षिततेचे नियम किती काटेकोरपणे पाळले जातात, यावर प्रश्न उपस्थित झाले आहेत. ग्राहकांच्या आरोग्याशी संबंधित असल्याने या प्रकरणात प्रशासनाकडून काय कारवाई केली जाते, याकडे आता लक्ष लागले आहे. (Food Complaint)