मुंबई : मध्य मुंबईतील पवई परिसरातून एक धक्कादायक आणि तितकीच संतापजनक घटना समोर आली आहे. घरातील वाईट नजर आणि दृष्ट काढण्याच्या बहाण्याने तृतीयपंथीयाचे रूप धारण करून एका घरात शिरलेल्या नराधमाने महिलेवर लैंगिक अत्याचार केल्याचा प्रकार घडला आहे. याप्रकरणी पवई पोलिसांनी तत्परता दाखवत अवघ्या काही तासांत आरोपीच्या आवळल्या मुसक्या आहेत.
दृष्ट काढण्याच्या बहाण्याने बेडरूममध्ये प्रवेश
मिळालेल्या माहितीनुसार, १८ ऑगस्ट रोजी अनिल शेषराव शिंदे (वय २८) नावाच्या या आरोपीने साडी नेसून तृतीयपंथी असल्याचे भासवले. घरातील वाईट नजर काढतो असे सांगून तो पीडित महिलेच्या घरात शिरला. घरात प्रवेश मिळताच त्याने थेट बेडरूम गाठली आणि महिलेला जीवे मारण्याची तसंच शारीरिक इजा करण्याची धमकी दिली. या भीतीच्या साहाय्याने त्याने महिलेवर बलात्कार केला. या घटनेनंतर घाबरलेल्या पीडितेने तात्काळ पवई पोलीस ठाण्यात धाव घेऊन तक्रार नोंदवली.
सीसीटीव्हीच्या आधारे ठाण्यातून आरोपीला ठोकल्या बेड्या
घटनेचे गांभीर्य ओळखून पोलिसांनी तात्काळ तपासाची चक्रे फिरवली. परिसरातील सीसीटीव्ही कॅमेऱ्यांचे फुटेज तपासले असता, साडी नेसलेला एक संशयित व्यक्ती रिक्षाने ठाण्यातील खारेगाव झोपडपट्टीच्या दिशेने पसार झाल्याचे दिसून आले. पोलिसांनी तांत्रिक तपासाच्या आधारे मागोवा घेत खारेगावमधून अनिल शिंदे याला ताब्यात घेतले. चौकशीदरम्यान समोर आले की, आरोपी केवळ तृतीयापंथीयाचेच नव्हे, तर भिकाऱ्याचे सोंग घेऊनही लोकांची दिशाभूल करायचा.
पोलीस प्रशासनाकडून नागरिकांना सतर्कतेचे आवाहन
या धक्कादायक घटनेनंतर पोलीस प्रशासनाने नागरिकांना विशेष खबरदारी घेण्याचे आवाहन केले आहे. अनोळखी व्यक्ती, भिकारी किंवा दृष्ट काढण्याच्या बहाण्याने येणाऱ्या कोणत्याही व्यक्तीला थेट घरात प्रवेश देऊ नका, असा स्पष्ट इशारा पोलिसांनी दिला आहे. परिसरात अशी कोणतीही संशयास्पद व्यक्ती आढळल्यास तात्काळ स्थानिक पोलिसांशी संपर्क साधावा, असेही स्पष्ट करण्यात आले आहे.