मुंबई : जर्मनीतील हेसन राज्य आणि महाराष्ट्र यांच्यातील भागीदारी ही दोन आर्थिक सक्षम राज्यांमधील सहकार्य आहे. हेसन हे महाराष्ट्रासाठी जर्मनी आणि युरोपमधील तर महाराष्ट्र हे हेसनसाठी भारत आणि इंडो-पॅसिफिक प्रदेशातील प्रवेशद्वार ठरेल, महाराष्ट्र-हेसन भागीदारीतून गुंतवणूक, नवोन्मेष, रोजगार आणि कौशल्य विकासाला चालना मिळेल आणि नागरिकांसाठी नव्या संधी निर्माण होतील, असा विश्वास मुख्यमंत्री देवेंद्र फडणवीस यांनी व्यक्त केला. महाराष्ट्र आणि हेसन मधील परस्पर सहकार्य वृद्धिंगत करण्यासाठी सह्याद्री अतिथीगृह येथे आयोजित बैठकीत परस्पर सामंजस्य करार करण्यात आला. या करारावर महाराष्ट्राचे मुख्यमंत्री देवेंद्र फडणवीस आणि हेसन राज्याचे अध्यक्ष बोरीस ऱ्हेइन यांनी स्वाक्षरी केली. यावेळी मुख्यमंत्र्यांचे अपर मुख्य सचिव लोकेश चंद्र, प्रधान सचिव डॉ. श्रीकर परदेशी, उद्योग विभागाचे प्रधान सचिव डॉ.पी.अन्बळगन, मुख्यमंत्र्यांचे गुंतवणूक सल्लागार कौस्तुभ धवसे, कौशल्य विकास आयुक्त अमित सैनी, सचिव तथा मुख्य राजशिष्टाचार अधिकारी डॉ. राजेश गवांदे यांच्यासह जर्मनीच्या हेसन राज्याचे शिष्टमंडळ उपस्थित होते.
यावेळी मुख्यमंत्री देवेंद्र फडणवीस म्हणाले की, विश्वास, ज्ञान, व्यापार, नवोन्मेष आणि लोकांमधील संबंधांच्या भक्कम पायावर भारत-जर्मनी भागीदारी उभी आहे. राष्ट्रीय स्तरावरील सहकार्याला आता राज्यस्तरावरील आर्थिक भागीदारीची जोड मिळत असून महाराष्ट्र आणि हेसन या दोन्ही राज्यांतील आर्थिक सामर्थ्य, औद्योगिक प्रगती आणि नवोन्मेष क्षमता यामुळे हे सहकार्य अधिक बळकट होणार आहे. फ्रँकफर्ट हे युरोपमधील प्रमुख वित्तीय केंद्र असून मुंबई ही भारताची आर्थिक राजधानी आहे. वित्त, उद्योग, तंत्रज्ञान, संशोधन आणि कुशल मनुष्यबळ या क्षेत्रांतील सामर्थ्यामुळे फ्रँकफर्ट आणि मुंबई परस्परांच्या अर्थव्यवस्थांचे प्रवेशद्वार बनू शकतात, असे मुख्यमंत्री म्हणाले. महाराष्ट्राला जगातील अग्रगण्य गुंतवणूक व नवोन्मेष केंद्र बनविण्याचा राज्य शासनाचा संकल्प असल्याचे सांगून मुख्यमंत्री म्हणाले की, हेसनमधील उद्योगसमूह या प्रवासातील महत्त्वाचे भागीदार ठरू शकतात. युरोपियन युनियन-भारत मुक्त व्यापार करारामुळे व्यापार आणि गुंतवणुकीसाठी अधिक अनुकूल वातावरण निर्माण झाले असून त्याचा लाभ यंत्रसामग्री, रसायने, औषधनिर्मिती, वैद्यकीय तंत्रज्ञान, वाहन उद्योग तसेच महाराष्ट्रातील उत्पादन आणि जीवन विज्ञान क्षेत्रांना होईल.
करारात उद्योग, सेवा, माहिती तंत्रज्ञान तसेच कुशल मनुष्यबळ व सीमापार गतिशीलता या चार प्रमुख क्षेत्रांचा समावेश करण्यात आला आहे. औषधनिर्मिती, आरोग्यसेवा, अभियांत्रिकी, वाहन उद्योग, वित्तीय सेवा, लॉजिस्टिक्स, डिजिटल अर्थव्यवस्था आणि कृत्रिम बुद्धिमत्ता या क्षेत्रांमध्ये व्यापक सहकार्याच्या संधी उपलब्ध आहेत. हेसनमधील उद्योगांनी महाराष्ट्रात अधिक गुंतवणूक करावी तसेच महाराष्ट्रातील उद्योगांनी जर्मनी आणि युरोपियन बाजारपेठेत प्रवेशासाठी हेसनचा उपयोग करावा, असे आवाहन मुख्यमंत्री फडणवीस यांनी केले. शिक्षण, संशोधन आणि कौशल्य विकास क्षेत्रातील सहकार्यालाही विशेष महत्त्व देऊन नवी मुंबईजवळील एज्युकेशन सिटीमध्ये हेसनमधील अग्रगण्य विद्यापीठांनी यावे, अशी अपेक्षा त्यांनी व्यक्त केली. जर्मनीतील कुशल मनुष्यबळाची वाढती गरज आणि महाराष्ट्रातील मोठा युवा वर्ग लक्षात घेता कौशल्य विकास व रोजगाराच्या नव्या संधी निर्माण करण्यासाठी सहकार्य करण्याचे आवाहन मुख्यमंत्री फडणवीस यांनी केले. कराराच्या अंमलबजावणीसाठी संयुक्त कार्यगट स्थापन करण्यात येणार असल्याचे सांगून मुंबई आणि हेसन येथे नियमित ‘महाराष्ट्र-हेसन बिझनेस डायलॉग’ आयोजित करण्याचाही प्रस्ताव त्यांनी मांडला.
यावेळी बोरीस ऱ्हेइन यांनी मुख्यमंत्री देवेंद्र फडणवीस यांच्या नेतृत्वाखाली महाराष्ट्रात वेगाने होत असलेल्या पायाभूत सुविधा विकासाची तसेच जागतिक उद्योग व तंत्रज्ञान गुंतवणुकीसाठी महाराष्ट्राने निर्माण केलेल्या अनुकूल वातावरणाची प्रशंसा केली. भारत आणि जर्मनी तसेच महाराष्ट्र आणि हेसन यांच्यातील संबंध केवळ आर्थिक व औद्योगिक सहकार्यापुरते मर्यादित नसून लोकशाही, कायद्याचे राज्य, बहुपक्षीय सहकार्य आणि नियमाधिष्ठित आंतरराष्ट्रीय व्यवस्थेच्या समान मूल्यांवर आधारित असल्याचे त्यांनी सांगितले. हेसन हे जर्मनीतील वित्तीय आणि आर्थिकदृष्ट्या महत्त्वाचे राज्य असून दोन्ही राज्यांमधील सामंजस्य करारामुळे उद्योग, गुंतवणूक, कौशल्य विकास, व्यावसायिक प्रतिनिधीमंडळांची देवाणघेवाण, गुंतवणूकदारांना सहाय्य आणि नव्या व्यावसायिक संधी निर्माण करण्यास चालना मिळेल, असा विश्वास त्यांनी व्यक्त केला.