Gujrat : बडोदऱ्यातून एक अत्यंत संतापजनक आणि धक्कादायक प्रकार समोर आला आहे. भूत-प्रेत आणि चेटकिणीची भीती दाखवून, तसेच मानसिक आणि शारीरिक छळ करून एका तरुणीला आत्महत्येसाठी प्रवृत्त करणाऱ्या स्वयंचलित 'तांत्रिक' विरोधात पोलिसांनी कठोर कायदेशीर कारवाई केली आहे. या प्रकरणी फॉरेन्सिक अहवाल समोर आल्यानंतर मृत्यूनंतर तब्बल साडेसात महिन्यांनी आरोपीला बेड्या ठोकण्यात आल्या आहेत.
नेमकं प्रकरण काय?
साडेसात महिन्यांपूर्वी एका तरुण मॉडेलिंग करणाऱ्या तरुणीने राहत्या घरी विष प्राशन करून आत्महत्या केली होती. सुरुवातीला हे आत्महत्येचे सामान्य प्रकरण असल्याचे वाटत होते. मात्र, मृत तरुणीच्या मोबाईल फोन, व्हिसेरा आणि फॉरेन्सिक (FSL) अहवालातून धक्कादायक खुलासे समोर आले.
तपासात उघड झाले की, दोन वर्षांपूर्वी जेव्हा तरुणीच्या छातीत दुखू लागले आणि प्रकृती बिघडली, तेव्हा एका परिचिताने तिची ओळख या स्वयंघोषित तांत्रिकशी करून दिली होती. सुरुवातीला काही विधी केल्यानंतर तिला बरे वाटल्याचा बहाणा करून, या भोंदू बाबाने तिच्या घरी जाणे-येणे सुरू केले. त्यानंतर तो 'छातीवर चेटकीण बसली आहे' आणि 'भूत-प्रेतांचा प्रभाव आहे' अशी भीती घालून तिला सातत्याने धमकावू लागला.
शारीरिक छळ आणि पैशांची वसुली
आरोपी तांत्रिक विधी आणि जादूटोण्याच्या नावाखाली तरुणीचा मानसिक व शारीरिक छळ करत होता. तो तिच्यावर शारीरिक संबंधांसाठी दबाव टाकत असे आणि नकार दिल्यास कुटुंबावर जादूटोणा करण्याची धमकी देत असे. गुगल पे (G-Pay) द्वारे तरुणीकडून वारंवार पैसे उकळण्यात आले.
तरुणी मृत्यूशी झुंज देत असतानाही हा भोंदू बाबा तिला धमकावत होता. रुग्णालयात उपचारादरम्यान त्यानेच तरुणीने उंदराचे विष घेतल्याचे डॉक्टरांना सांगितले होते, मात्र स्वतःचे नाव बाहेर येऊ नये म्हणून तो सतत कुटुंबियांना आणि तरुणीला धमक्या देत असे. अखेरीस या सततच्या मानसिक त्रासाला कंटाळून तरुणीने टोकाचे पाऊल उचलले.
फॉरेन्सिक अहवालातून बिंग फुटले
तरुणीच्या मृत्यूनंतर सुरुवातीला कुटुंबाने भीतीपोटी मौन बाळगले होते. मात्र, मृत तरुणीच्या बहिणीच्या समजुतीनंतर आणि एफएसएलचा (FSL) अहवाल हातात आल्यानंतर कुटुंबीयांनी पोलिसांत धाव घेतली. पोलिसांनी वैज्ञानिक पुराव्यांच्या आधारे व्हॉट्सॲप चॅट्स, कॉल्स आणि गुगल पे व्यवहारांची पडताळणी केली.
तरुणीच्या घरातून मंतरलेले दगड, अत्तराची बाटली, मधाची बाटली, माळ आणि तिच्या कातलेल्या केसांसारखे तांत्रिक विधींचे साहित्य देखील पुराव, म्हणून जप्त करण्यात आले आहे. याप्रकरणी पोलिसांनी भारतीय न्याय संहितेच्या (BNS) संबंधित कलमांनुसार गुन्हा दाखल केला असून, अंधश्रद्धेच्या नावाखाली बळी पडणाऱ्या इतर महिलांनीही पुढे येण्याचे आवाहन केले आहे.