मुंबई : मुंबई-अहमदाबाद बुलेट ट्रेन प्रकल्पाच्या संचालनासाठी मनुष्यबळाची तयारी वेगाने सुरू झाली आहे. नॅशनल हायस्पीड रेल कॉर्पोरेशन लिमिटेडने (NHSRCL) प्रकल्पासाठी १६ हायस्पीड रेल्वे चालकांची नियुक्ती केली असून, या सर्व चालकांना जपानमध्ये एक वर्षाचे विशेष प्रशिक्षण देण्यात आले आहे. जपानी शिंकान्सेन तंत्रज्ञानावर आधारित या प्रकल्पासाठी चालकांना अत्याधुनिक तंत्रज्ञानासोबतच सुरक्षा मानके आणि कार्यपद्धतीचे प्रशिक्षण देण्यात येत आहे.
मुंबई-अहमदाबाद बुलेट ट्रेन प्रकल्पाची लांबी ५०८ किलोमीटर असून, गुजरातमधील वापी ते साबरमती हा टप्पा डिसेंबर २०२७ पर्यंत पूर्ण करण्याचे नियोजन आहे. तर मुंबई ते साबरमती संपूर्ण मार्ग डिसेंबर २०२९ पर्यंत पूर्ण होण्याची अपेक्षा आहे. रेल्वे रूळ, विद्युतीकरण, सिग्नलिंग, दूरसंचार आणि इतर पायाभूत सुविधांची कामे पूर्ण झाल्यानंतर प्रकल्पाच्या संचालनाची अचूक वेळ निश्चित केली जाणार आहे. (Mumbai-Ahmedabad Bullet Train)
चालकांना विशेष वेतनश्रेणी
नियुक्त करण्यात आलेल्या बुलेट ट्रेन चालकांचा समावेश अ-कार्यकारी (NE)-४ श्रेणीत करण्यात आला आहे. त्यांना ४० हजार ते १.२५ लाख रुपयांची औद्योगिक महागाई भत्ता (IDA) वेतनश्रेणी लागू आहे. याशिवाय NHSRCLच्या नियमांनुसार विविध भत्ते आणि इतर सुविधाही मिळणार आहेत.
२६० कर्मचाऱ्यांना जपानी भाषेचे प्रशिक्षण
प्रकल्पासाठी केवळ चालकांनाच प्रशिक्षण दिले जात नसून इतर कर्मचाऱ्यांनाही जपानी कार्यपद्धती आणि संस्कृतीशी परिचित करून दिले जात आहे. आतापर्यंत सुमारे २६० कर्मचाऱ्यांनी मूलभूत जपानी भाषा आणि संस्कृतीचे प्रशिक्षण घेतले आहे. तसेच NHSRCLच्या अनेक अधिकाऱ्यांनी जपानी भाषा प्रावीण्य परीक्षा (JLPT) उत्तीर्ण करून N1 ते N5 स्तरांपर्यंतची प्रमाणपत्रे मिळवली आहेत. (Mumbai-Ahmedabad Bullet Train)
५०८ किमी मार्गावर तीन आगार
बुलेट ट्रेनच्या रेकची नियमित तपासणी, देखभाल आणि दुरुस्तीसाठी ठाणे, सुरत आणि साबरमती येथे आगार उभारण्यात येत आहेत. या आगारांमध्ये आपत्कालीन देखभाल, रेकची दुरुस्ती, री-प्रोफाइलिंग तसेच उपकरणे आणि बोगींच्या देखभालीसाठी स्वतंत्र सुविधा उपलब्ध असतील.
साबरमती येथील रोलिंग स्टॉक आगारात हलकी तसेच मोठी देखभाल करण्याची सुविधा असेल. सुरुवातीला चार तपासणी मार्गिका आणि दहा देखभाल-दुरुस्ती मार्गिका उभारल्या जाणार आहेत. प्रवासी सेवा वाढल्यानंतर तपासणी मार्गिका आठ आणि देखभाल-दुरुस्ती मार्गिका २१ करण्याची तरतूद करण्यात आली आहे.
भारतातील पहिल्या बुलेट ट्रेनसाठी पायाभूत सुविधांसोबतच प्रशिक्षित चालक आणि तांत्रिक मनुष्यबळाची तयारी सुरू झाल्याने प्रकल्पाच्या संचालनाच्या दिशेने आणखी एक महत्त्वाचा टप्पा गाठला आहे.