मुंबई : मुंबईतील भुलेश्वर परिसरात ‘भुलेश्वरचा राजा’ गणेशमूर्तीच्या आगमन मिरवणुकीदरम्यान शनिवारी (दि. २२ ऑगस्ट) रात्री मोठी दुर्घटना घडली. २२ फूट उंचीची गणेशमूर्ती मंडपात आणत असताना अचानक तोल गेल्याने मूर्ती खाली कोसळली. या दुर्घटनेत चौघे जखमी झाले असून उपचारादरम्यान दोघांचा मृत्यू झाला.
अखिल भुलेश्वर सार्वजनिक गणेशोत्सव मंडळाचे कार्यकर्ते आणि पदाधिकारी २२ फूट उंचीची गणेशमूर्ती वाजतगाजत भुलेश्वरमधील कबुतरखाना परिसरात आणत होते. रात्री सुमारे ९.५० वाजता मूर्ती परिसरात पोहोचली असताना अचानक तिचा तोल गेला आणि मूर्ती मंडळाच्या कार्यकर्ते व पदाधिकाऱ्यांच्या अंगावर कोसळली. दुर्घटनेनंतर जखमींना तातडीने रुग्णालयात दाखल करण्यात आले.
या दुर्घटनेत मंडळाचे अध्यक्ष आणि शिवसेनेचे उपविभाग प्रमुख संकेत नेवशे (३३) यांचा उपचारादरम्यान मृत्यू झाला. तसेच ब्रिजेश जोशी (३०) यांच्या छातीला गंभीर मार लागल्याने उपचारादरम्यान त्यांचाही मृत्यू झाला. इतर दोघांवर रुग्णालयात उपचार सुरू आहेत.
मुख्यमंत्र्यांकडून शोक व्यक्त
या दुर्घटनेनंतर मुख्यमंत्री देवेंद्र फडणवीस यांनी सोशल मीडिया प्लॅटफॉर्म ‘एक्स’वर पोस्ट करत मृत गणेशभक्तांना श्रद्धांजली वाहिली. हि घटना अत्यंत दुर्दैवी आणि मन हेलावून टाकणारी असल्याचे त्यांनी म्हटले. जखमी गणेशभक्तांवर रुग्णालयात उपचार सुरू असून त्यांची प्रकृती लवकर सुधारावी, अशी प्रार्थना करत त्यांनी मृतांच्या कुटुंबीयांप्रती शोक व्यक्त केला.