बीड : बीड शहरातील शिवतेज नगर भागात रेणू हॉस्पिटल परिसरात घराबाहेर खेळत असलेल्या दोन वर्षांच्या चिमुकलीवर मोकाट कुत्र्याने जीवघेणा हल्ला केला. शिवांशी रामेश्वर घोलप असे या गंभीर जखमी झालेल्या मुलीचे नाव असून, कुत्र्याने तिच्या गालाचा थेट चावा घेतल्याने तिला तब्बल १३ टाके पडले आहेत. या भयानक घटनेनंतर शिवांशीला तातडीने एका खाजगी रुग्णालयात दाखल करण्यात आले असून, सध्या तिच्यावर अतिदक्षता विभागात (आयसीयू) उपचार सुरू आहेत.
शिवांशी आपल्या घरासमोर खेळत असताना अचानक एका भटक्या कुत्र्याने तिच्यावर झडप घातली. कुत्र्याने थेट तिच्या चेहऱ्याचा लचका तोडण्याचा प्रयत्न केला. वेदनेने विव्हळणाऱ्या शिवांशीच्या किंकाळ्या ऐकून सतर्क झालेल्या शेजाऱ्यांनी तातडीने धाव घेतली आणि कुत्र्याच्या तावडीतून तिची सुटका केली. काळजाचा ठोका चुकवणारी ही संपूर्ण घटना परिसरातील सीसीटीव्ही कॅमेऱ्यात कैद झाली आहे. शेजाऱ्यांनी दाखवलेल्या तत्परतेमुळे शिवांशीचा जीव वाचला असला, तरी या हल्ल्यामुळे ती प्रचंड दहशतीखाली आहे.
शहरात मोकाट कुत्र्यांचा सुळसुळाट झाला असतानाही पालिकेकडून कोणतीही ठोस कारवाई केली जात नाही. या ताज्या घटनेनंतर शिवतेज नगरसह संपूर्ण बीड शहरात प्रशासनाविरोधात संतापाची लाट उसळली आहे. निष्पाप जीवांचे बळी जाण्याची वाट न पाहता, भटक्या कुत्र्यांच्या या जीवघेण्या उपद्रवावर नगरपरिषद प्रशासन कायमस्वरूपी उपाययोजना कधी करणार, असा परखड आणि संतप्त सवाल आता नागरिकांकडून उपस्थित केला जात आहे.