नागपूर : नागपूरमधील गोधणी परिसरात मध्यरात्री जलशुद्धीकरण प्रकल्पातून क्लोरिन वायूची गळती झाल्याने मोठी खळबळ उडाली. विषारी वायूचा प्रभाव झाल्याने प्रकल्पातील कर्मचारी आणि परिसरातील नागरिकांना श्वास घेण्यास त्रास होऊ लागला. या घटनेत सुमारे 40 जणांना उपचारासाठी रुग्णालयात दाखल करण्यात आले असून, त्यापैकी 4 ते 5 जणांची प्रकृती गंभीर असल्याची माहिती आहे. (Nagpur)
मिळालेल्या प्राथमिक माहितीनुसार, गोधणी नगरपंचायतीच्या जलशुद्धीकरण प्रकल्पात मध्यरात्रीच्या सुमारास क्लोरिन वायूची गळती सुरू झाली. काही वेळातच वायू आसपासच्या परिसरात पसरला. प्रकल्पातील 8 ते 10 कर्मचारी तसेच जवळच्या परिसरातील 20 ते 25 नागरिकांना अचानक गुदमरल्यासारखे होऊन श्वसनाचा त्रास जाणवू लागला. (Gas Leak)
घटनेची माहिती मिळताच बाधित नागरिकांना तातडीने रुग्णालयात हलवण्यात आले. त्यापैकी काहींची प्रकृती चिंताजनक असल्याने त्यांना आयसीयूमध्ये दाखल करण्यात आले आहे. इतरांवरही वैद्यकीय उपचार सुरू आहेत. (Gas Leak News)
दरम्यान, गॅस गळतीची माहिती मिळताच अग्निशमन दल, पोलीस प्रशासन आणि एनडीआरएफचे पथक घटनास्थळी दाखल झाले. गळतीवर नियंत्रण मिळवण्यासाठी अग्निशमन दलाच्या जवानांकडून युद्धपातळीवर प्रयत्न सुरू करण्यात आले.
सुरक्षेच्या दृष्टीने गळतीच्या ठिकाणापासून सुमारे 200 मीटर परिसर रिकामा करण्यात आला असून नागरिकांना सुरक्षित ठिकाणी हलवण्यात आले आहे. खबरदारीचा उपाय म्हणून सकाळी 11 वाजेपर्यंत या परिसरात नागरिकांना प्रवेशास मनाई करण्यात आल्याची माहिती समोर आली आहे.
या गॅस गळतीचे नेमके कारण काय, याचा तपास प्रशासनाकडून सुरू आहे. घटना नियंत्रणात आणण्यासाठी संबंधित यंत्रणांकडून आवश्यक उपाययोजना केल्या जात आहेत. (Maharashtra News)