Miss Universe India 2026 : केरळची सौंदर्यवती केझिया लिझ मेजो हिने ‘मिस युनिव्हर्स इंडिया 2026’चा प्रतिष्ठित किताब पटकावला आहे. 23 ऑगस्ट रोजी जयपूरमध्ये या स्पर्धेचा भव्य अंतिम सोहळा पार पडला. देशभरातील स्पर्धकांनी सौंदर्य, आत्मविश्वास, बुद्धिमत्ता, संभाषण कौशल्य आणि नेतृत्वगुणांचे प्रदर्शन केले. (Kezia Liz Mejo)
केझियाने आपल्या आत्मविश्वासपूर्ण व्यक्तिमत्त्वाने आणि उत्कृष्ट कामगिरीने परीक्षकांची मने जिंकत विजेतेपदावर नाव कोरले. तामिळनाडूची वैष्णवी गणेश प्रथम उपविजेती, तर गुजरातची अनुश्री सातवलेकर द्वितीय उपविजेती ठरली.
आता मिस युनिव्हर्स स्पर्धेत भारताचे प्रतिनिधित्व
‘मिस युनिव्हर्स इंडिया 2026’चा मुकुट जिंकल्यानंतर केझिया लिझ मेजो आता आंतरराष्ट्रीय ‘मिस युनिव्हर्स’ स्पर्धेत भारताचे प्रतिनिधित्व करणार आहे. भारताची विविधता, संस्कृती आणि नव्या पिढीचा आत्मविश्वास जगासमोर मांडण्याची इच्छा तिने व्यक्त केली.
विजयानंतर केझियाने हा किताब केवळ यश नसून मोठी जबाबदारी असल्याचे म्हटले. आंतरराष्ट्रीय व्यासपीठावर भारताचे प्रतिनिधित्व करणे ही अभिमानाची बाब असल्याचेही तिने सांगितले.
जयपूरमध्ये सौंदर्य आणि संस्कृतीचा संगम
जयपूरमध्ये झालेल्या या सोहळ्यात राजस्थानी संस्कृती आणि आधुनिक भारताचे सुंदर दर्शन घडले. स्पर्धेदरम्यान केवळ सौंदर्यावरच नव्हे, तर स्पर्धकांची विचारशक्ती, आत्मविश्वास, नेतृत्वक्षमता आणि व्यक्तिमत्त्व यावरही भर देण्यात आला.
या कार्यक्रमाला अभिनेत्री आणि माजी मिस युनिव्हर्स सुष्मिता सेन, माजी मिस युनिव्हर्स इंडिया उर्वशी रौतेला आणि माजी मिस युनिव्हर्स फर्स्ट रनर-अप सेलिना जेटली यांच्यासह अनेक मान्यवर उपस्थित होते.
आता केझियाच्या रूपाने भारताची नजर आगामी ‘मिस युनिव्हर्स’ स्पर्धेकडे लागली असून, आंतरराष्ट्रीय स्तरावर ती भारताचे प्रतिनिधित्व कशी करते, याची उत्सुकता वाढली आहे.