मुंबई : ‘भुलेश्वरचा राजा’ गणेशमूर्ती दुर्घटनेच्या तपासात धक्कादायक माहिती समोर आली आहे. २२ फूट उंचीची भव्य गणेशमूर्ती आगमन सोहळ्यादरम्यान क्रेनवरून कोसळून दोन मंडळ पदाधिकाऱ्यांचा मृत्यू झाला होता. या प्रकरणाचा तपास एल. टी. मार्ग पोलीस करत असून, पोलिसांनी मूर्तिकार अनिकेत देसाई यांचा जबाब नोंदवला आहे. ( Bhuleshwar Cha Raja)
देसाई यांच्या चौकशीत मूर्ती आगमन सोहळ्यासाठी कारखान्यातून बाहेर पडल्यानंतर अवघ्या १०० ते १५० मीटर अंतरावरच तिच्या पाठीमागील मुख्य वेल्डिंग तुटल्याची माहिती समोर आली आहे.
वेल्डिंग तुटले अन् मूर्ती पुन्हा कारखान्यात नेली
मूर्तीचे वेल्डिंग तुटल्याचे लक्षात आल्यानंतर ती पुन्हा कारखान्यात आणण्यात आली. तेथे तातडीने वेल्डिंग करून आवश्यक दुरुस्ती करण्यात आली. त्यानंतर मंडळाच्या पदाधिकाऱ्यांनी मूर्ती पुन्हा आगमन सोहळ्यासाठी नेल्याचे मूर्तिकाराने पोलिसांना सांगितल्याची माहिती आहे. ( Ganeshotsav 2026)
मूर्ती लवकर नेण्याबाबतही सूचना?
दरम्यान, यापूर्वी मूर्तिकार अनिकेत देसाई यांनी मंडळाला मूर्ती आणखी काही दिवस कारखान्यात ठेवण्याचा सल्ला दिल्याचे वृत्त समोर आले होते. मूर्ती पूर्णपणे सुकलेली नसल्याने तसेच काही काम बाकी असल्याने आणखी सुमारे १० दिवसांनी मूर्ती नेण्याची सूचना करण्यात आली होती, अशी माहिती आहे. ( Mumbai Ganeshotsav News)
मात्र, डेकोरेटरच्या वेळापत्रकामुळे मूर्ती लवकर नेण्यात आल्याचे सांगितले जात आहे. आता मूर्तीच्या बांधकामाची स्थिती, वेल्डिंग, वाहतूक आणि आगमन सोहळ्यादरम्यान घेतलेल्या सुरक्षेच्या उपाययोजनांचा पोलीस तपास करत आहेत.
या दुर्घटनेत मंडळाचे अध्यक्ष संकेत नेवशे आणि पदाधिकारी ब्रिजेश जोशी यांचा मृत्यू झाला होता, तर दोन लहान मुलींसह पाच जण जखमी झाले होते. त्यामुळे या प्रकरणातील तपासाकडे गणेश मंडळांचे तसेच गणेशभक्तांचे लक्ष लागले आहे. ( Ganesha Idol Incident)