मुंबई : ईद-ए-मिलादच्या निमित्ताने मुंबईत मोठ्या संख्येने मिरवणुका निघण्याची शक्यता असल्याने मुंबई पोलिसांनी शहरात कडेकोट सुरक्षा व्यवस्था केली आहे. कायदा आणि सुव्यवस्था कायम राखण्यासाठी संवेदनशील तसेच गर्दीच्या ठिकाणी मोठ्या प्रमाणावर पोलीस बंदोबस्त तैनात करण्यात आला आहे.
मुंबई पोलीस आयुक्तांच्या मार्गदर्शनाखाली आणि सह पोलीस आयुक्त (कायदा व सुव्यवस्था) यांच्या देखरेखीखाली या सुरक्षा व्यवस्थेचे नियोजन करण्यात आले आहे.
१० हजारांहून अधिक पोलीस तैनात
ईद-ए-मिलादचा उत्सव नागरिकांनी शांततेत आणि सुरक्षित वातावरणात साजरा करावा, यासाठी ८ अतिरिक्त पोलीस आयुक्त, २९ पोलीस उपायुक्त, ५६ सहायक पोलीस आयुक्त, १,६१८ पोलीस अधिकारी आणि ८,३२५ पोलीस कर्मचारी सुरक्षेसाठी तैनात करण्यात आले आहेत.
नियमित पोलीस बंदोबस्तासोबतच एसआरपीएफ, क्विक रिस्पॉन्स टीम (QRT), दंगल नियंत्रण पथक, डेल्टा टीम आणि कॉम्बॅट टीम यांनाही महत्त्वाच्या आणि संवेदनशील ठिकाणी तैनात करण्यात आले आहे.
मुंबई पोलिसांकडून नागरिकांना शांतता आणि संयम राखण्याचे आवाहन करण्यात आले आहे. विशेषतः मिरवणूक आणि गर्दीच्या ठिकाणी नागरिकांनी पोलीस कर्मचाऱ्यांना सहकार्य करावे, असे पोलिसांनी सांगितले.
तसेच, कोणतीही बेवारस किंवा संशयास्पद वस्तू आढळल्यास त्याला हात न लावता तात्काळ १०० किंवा ११२ या क्रमांकावर पोलिसांना माहिती देण्याचे आवाहन करण्यात आले आहे.